“ვითიბი ჯგუფის” კომპანიებმა საერთაშორისო ფაქტორინგული გარიგება განახორციელეს. ორფაქტორიანი საერთაშორისო ფაქტორინგის მოდელით დადებული გარიგების ფარგლებში „ვითიბი ბანკი ჯორჯიამ“  დაუწესა ლიმიტი ქართული ღვინის ერთ–ერთ წამყვან მწარმოებელს, კომპანია „მარნის კარს“, 1,200,000 ლარის ოდენობით, ხოლო „ვითიბი  ფაქტორინგმა“ – საკუთარ თავზე აიღო დებიტორის რისკები.

როგორც „პრაიმნიუსჯორჯიას“ „ვითიბიდან“ აცნობეს, ფაქტორინგული მომსახურება მყიდველს საქონლის ან გაწეული მომსახურების  შეძენისას გადავადებული გადახდის შესაძლებლობას აძლევს,   ხოლო გამყიდველი მიწოდებული საქონლის ან გაწეული მომსახურების ანაზღაურებას იღებს საქონლის მიწოდებისთანავე.

ფაქტორინგი წარმოადგენს ფინანსურ ინსტრუმენტს, როდესაც დაფინანსების საფუძველია ფაქტორის (ბანკის) მიერ კლიენტის (გამყიდველის) დებიტორული დავალიანების შესყიდვა. ამასთან ერთად, ფაქტორინგი წარმოადგენს კომპლექსურ მომსახურებას. ფინანსირების მიღმა იგი  მოიცავს გადაუხდელობის რისკის დაზღვევას, საინფორმაციო-ანალიტიკურ და შემგროვებლის მომსახურებას.

„საერთაშორისო ფაქტორინგი, ქართული კომპანიებისთვის წარმოადგენს რისკების მინიმუმამდე შემცირების ეფექტურ საშუალებას და უგირავნო ფინანსირების ინსტრუმენტს. გარიგების გაფორმება შესაძლებელი გახდა,  ვითიბი ჯგუფის შიგნით  ეფექტურად გამართული ურთიერთთანამშრომლობის სქემის წყალობით“, - განაცხადა „ვითიბი ბანკი ჯორჯიას“ გენერალურმა დირექტორმა, არჩილ კონცელიძემ.