ოკუპირებულ აფხაზეთში ე.წ. ვადამდელი საპრეზიდენტო არჩევნების დანიშვნის შესახებ რეფერენდუმი მოსახლეობის დაბალი აქტივობის გამო არ შედგა.

როგორც არაღიარებული რესპუბლიკის დეფაქტო ცენტრალური საარჩევნო კომისიის თავმჯდომარემ ბატალ ტაბაღუამ განაცხადა, ამომრჩეველთა აქტივობამ 1,23 პროცენტი შეადგინა. ხმის მიცემის პროცედურაში 1628 ადამიანმა მიიღო მონაწილეობა.

ე.წ. რეფერენდუმი იმ შემთხვევაში შედგებოდა, თუ მასში მონაწილეობას მიიღებდა რეგისტრირებულ ამომრჩეველთა 50 პროცენტზე მეტი.

ამასთან, აფხაზეთის დეფაქტო ცესკოს მონაცემებით, ამომრჩეველთა ხმები თითქმის თანაბრად გაიყო. ე.წ. ვადამდელი საპრეზიდენტო არჩევნების დანიშვნას 750 ადამიანმა მისცა ხმა, წინააღმდეგ კი - 761-მა.

ოპოზიციას ანალოგური რეფერენდუმის დანიშვნის მოთხოვნა მხოლოდ ორი წლის შემდეგ შეეძლება. აფხაზეთის დეფაქტო პრეზიდენტმა უკვე განაცხადა რომ ოპოზიციასთან დიალოგისთვის მზად არის.

გასულ კვირას ოპოზიციამ საკუთარი ინიციატივით დანიშნული რეფერენდუმის შემოდგომაზე გადატანა მოითხოვა. 5 ილისს სოხუმში ე.წ. შინაგან საქმეთა სმაინისტროს შენობასთან დემონსტრანტებსა და ადგილობრივ სამართალდამცველებს შორის შეტაკება მოხდა. მომიტინგეები დეფაქტო მინისტრის გადადგომას ითხოვდნენ. აქციის მონაწილეები ლეონიდ ძიაპშბას კრიმინოგენური ვითარების გაუარესებასა და რეფერენდუმზე მოსახლეობის ნების თავისუფალი გამოხატვის შეზღუდვაში ადანაშაულებდნენ. მოგვიანებით, რაულ ხაჯიმბასა და ოპოზიციის წარმომადგენლების მოლაპარაკებების შედეგად, დეფაქტო პრეზიდენტმა ლეონიდ ძიაპშბას უფლებამოსილება შეუჩერა