თბილისის მუნიციპალიტეტის საკრებულოს თავმჯდომარემ გიორგი ალიბეგაშვილმა პარლამენტის თავმჯდომარე დავით უსუფაშვილთან, დედაქალაქის მერ დავით ნარმანიასთან და საქართველოში დიდი ბრიტანეთის ელჩთან ალექსანდრა მერი ჰოლ ჰოლთან ერთად ინგლისელი დიპლომატის, მთარგმნელისა და მოგზაურის, ოლივერ უორდროპის სახელობის სკვერში და-ძმა მარჯორი და ოლივერ უორდროპების ძეგლი გახსნა.

ღონისძიებას დედაქალაქის საკრებულოს დეპუტატები, ასევე პარლამენტისა და მერიის წარმომადგენლები ესწრებოდნენ.

ალექსანდრა მერი ჰოლ ჰოლიმ დედაქალაქის საკრებულოსა და მერიას დანაპირების ასრულებისთვის მადლობა გადაუხადა და აღნიშნა, რომ დღევანდელი დღე კიდევ ერთხელ უსვამს ხაზს საქართველოსა და დიდი ბრიტანეთის მჭიდრო ურთიერთობას.

საკრებულოს თავმჯდომარემ სიტყვით გამოსვლისას შეკრებილ საზოგადოებას თბილისობის დღესასწაული მიულოცა და ოლივერ და მარჯორი უორდროპებთან ერთად ილია ჭავჭავაძეც გაიხსენა, რომელსაც ინგლისელი და-ძმის საქართველოსთან დაახლოებაში დიდი წვლილი მიუძღვის.  

გიორგი ალიბეგაშვილმა ასევე აღნიშნა, რომ საკრებულომ და მერიამ შეასრულეს შარშანდელი დანაპირები და ერთი წლის თავზე სკვერში ოლივერ და მარჯორი უორდროპების ძეგლი გახსნეს.

,, ძეგლი კონკურსის სახით შეირჩა და უდაოა, რომ გაიმარჯვა ღირსეულმა და ყველაზე შესაფერისმა პროექტმა. ამისათვის კი ავტორთან, ჯუმბერ ჯიქიასთან ერთად, დიდ მადლობას მოვახსენებ საკრებულოს განათლებისა და კულტურის კომისიის თავმჯდომარეს თამარ ტალიაშვილს, სახელდებისა და სიმბოლიკის კომისიის თავმჯდომარეს ლია ჯახველაძეს და მერიის კულტურის საქალაქო სამსახურის უფროსს ია მაქაცარიას, რადგან მათ ძალიან დიდი წვლილი მიუძღვით მიზნის მიღწევაში “,- განაცხადა გიორგი ალიბეგაშვილმა.  

ინგლისელი დიპლომატი, მოგზაური და მთარგმნელი ოლივერ უორდროპი საქართველოში პირველად 1887 წელს ჩამოვიდა. სამშობლოში დაბრუნების შემდეგ, მან დაწერა წიგნი „საქართველოს სამეფო“. ოლივერ უორდროპმა შეისწავლა ქართული ენა და 1919 წელს ის დამოუკიდებელი საქართველოს პირველი უცხოელი ელჩი გახდა. ოლივერ უორდროპი სისტემატურად გზავნიდა პატაკებს საქართველოს დამოუკიდებლობის აღიარების მოთხოვნით და სწორედ მან ახარა საქართველოს მთავრობას საერთაშორისო აღიარების შესახებ. საქართველოს მისი და, მარჯორი უორდროპიც სტუმრობდა, რომელმაც შემდეგ ინგლისურ ენაზე თარგმნა შოთა რუსთაველის "ვეფხისტყაოსანი“, ილია ჭავჭავაძის "განდეგილი" და "ქართული ხალხური ზღაპრები". უორდროპებმა თავისი მოღვაწეობა საქართველოს ისტორიისა და კულტურული მემკვიდრეობის შესწავლას მიუძღვნეს. მათი ძალისხმევით შეიქმნა ევროპაში ყველაზე მდიდარი ქართველოლოგიური ბიბლიოთეკა.