ევროპარლამენტში, საქართველოსთვის ვიზა ლიბერალიზაციის მინიჭების საკითხის კენჭისყრამდე სულ რამდენიმე საათი რჩება. მანამდე კი საქართველოს საპარლამენტო დელეგაცია, ირაკლი კობახიძის ხელმძღვანელობით, ევროპარლამენტში მაღალი დონის, მნიშვნელოვან შეხვედრებს განაგრძობს.

ევროკომისარ დიმიტრი ავრამოპულოსთან შეხვედრაზე საქართველოს ევროპული არჩევანის მხარდაჭერა კიდევ ერთხელ დაფიქსირდა.

საქართველოს პარლამენტის თავმჯდომარემ მადლობა გადაუხადა ევროკომისარს მხარდაჭერისა და პარტნიორობისთვის.

„რამდენიმე წუთი დარჩა კენჭისყრამდე და ჩვენ  მოუთმენლად ველოდებით ამ გადაწყვეტილების მიღებას. ეს არის უმნიშვნელოვანესი მოვლენა ჩვენი ქვეყნისთვის და საქართველოს მოქალაქეებისთვის. ქართველმა დეპუტატებმა დილიდან სხვადასხვა დელეგაციასთან შეხვედრები გავმართეთ და მხარდამჭერი მესიჯები მოვისმინეთ," - განაცხადა საგარეო ურთიერთობათა კომიტეტის თავმჯდომარემ სოფიო ქაცარავამ.

ორი დღის განმავლობაში საპარლამენტო დელეგაციამ არაერთი მნიშვნელოვანი და მაღალი დონის შეხვედრა გამართა, რომლებზეც საქართველოს მიერ განხორციელებულ დემოკრატიულ რეფორმებსა და ვიზა ლიბერალიზაციის სამოქმედო გეგმით ნაკისრი ვალდებულებების წარმატებით შესრულებაზე გამახვილდა ყურადღება.