ლიტვის პრეზიდენტი დალია გრიბაუსკაიტე საქართველოს ევროკავშირთან უვიზო მიმოსვლის რეჟიმის ამოქმედებას ულოცავს. გრიბაუსკაიტემ მილოცვის ტექსტი „ტვიტერზე“ გამოაქვეყნა. 

„საქართველოს მოქალაქეებისათვის ევროპისკენ გზა გაიხსნა! უსაფრთხო მგზავრობას გისურვებთ! გილოცავთ!“, - წერს დალია გრიბაუსკაიტე „ტვიტერზე“ იქვე აქვეყნებს ვიდეომიმართვასაც.

„ძვირფასო მეგობრებო, დღეს განსაკუთრებული დღეა, ვინაიდან საქართველოს მოქალაქეებმა დაიწყეს ევროკავშირის ქვეყნებთან უვიზოდ მოგზაურობა. დღეიდან ჩვენი ხალხები ერთმანეთს უფრო მეტად დაუახლოვდებიან. თქვენი მისწრაფება დემოკრატიისა და თავისუფლებისაკენ რეგიონის ქვეყნებისათვის სამაგალითოა. ლიტვა თქვენი გულითადი მეგობარია. ჩვენ ვამაყობთ თქვენი წარმატებით“, - აცხადებს დალია გრიბაუსკაიტე ვიდეომიმართვაში.

28 მარტიდან საქართველოს მოქალაქეები ევროპაში მოგზაურობას ვიზის გარეშე შეძლებენ.  

ბიომეტრიული პასპორტის მქონე საქართველოს მოქალაქეებს უვიზოდ გადაადგილების უფლება ექნებათ ევროკავშირის წევრ 22 ქვეყანაში,  ევროკავშირის არაწევრ 4 ქვეყანასა და შენგენის 4 კანდიდატ ქვეყანაში.