ნიკოლოზ ბასილაშვილი საფრანგეთის ღია პირველობის მეთექვსმეტედფინალშია. მსოფლიოს რეიტინგში 63-ე ადგილზე მყოფმა ქართველმა ჩოგბურთელმა დიდი სლემის სერიის მეორე ტურნირი თავისზე 31 საფეხურით წინ მდგომი ფრანგი ჟილ სიმონის ძლევით გახსნა. გუშინ კი, მეორე წრეში მსოფლიოს 35-ე ჩოგანს - სერბ ვიქტორ ტროიცკისაც აჯობა.

ბასილაშვილმა მეტოქეს საქმე სამსეტიან დაძაბულ ბრძოლაში მოუმთავრა. სამივე სეტი ტაიბრეიკით დასრულდა და 25 წლის ქართველმა 7:6, 7:6, 7:6 მოიგო.

მეთექვსმეტედფინალში ნიკოლოზ ბასილაშვილის მეტოქე "როლან გაროსის" 9-გზის ჩემპიონი და უმთავრესი ფავორიტი - ესპანელი რაფაელ ნადალი იქნება, რომელმაც მეორე წრეში ჰოლანდიელი რობინ ჰაასე ზედმეტი ნერვიულობის გარეშე დაამარცხა - 6:1, 6:4, 6:3.

ბასილაშვილისა და ნადალის მატჩი წინასწარი გრაფიკის თანახმად, 2 ივნისს, თბილისის დროით 13:00 საათზე დაიწყება.

ლუკა ქარსალაძე, პრაიმნიუსჯორჯია