ნაციონალურ საკალათბურთო ასოციაციაში სუპერფინალი დაიწყო და დასავლეთ კონფერენციის ჩემპიონმა „გოლდენ სტეიტ უორიორზმა" ტიტულისკენ პირველი ნაბიჯი გადადგა.

დღეს, დილაადრიან დასრულდა ფინალური სერიის პირველი მატჩი და ოკლენდელებმა საშინაო არენაზე NBA-ს მოქმედ ჩემპიონს - „კლივლენდ კავალიერსს" საკმაოდ ადვილად აჯობეს.

ქუსლის ტრავმით გამოწვეული რამდენიმემატჩიანი პაუზის შემდეგ, „გოლდენ სტეიტს" დაუბრუნდა ზაზა ფაჩულია. საქართველოს ნაკრების კაპიტანმა თამაში ტრადიციულად, სასტარტო ხუთეულში დაიწყო. სულ კი მოედანზე 14:26 წუთი გაატარა და თავი 8 ქულით და 6 მოხსნით გამოიჩინა.

კლივლენდელთა ცენტრმა ტრისტან ტომპსონმა კი თამაში უქულოდ ჩაამთავრა და ეს მნიშვნელოვანწილად სწორედ ფაჩულიას დამსახურებაა.

„გოლდენ სტეიტმა" ოთხივე პერიოდი მოიგო. დიდ შესვენებაზე მასპინძლები 8-ქულიანი უპირატესობით გავიდნენ - ანგარიში 60:52 იყო. მესამე მეოთხედი სტუმართათვის ყველაზე მძიმე გამოდგა - ნბა-ს ჩემპიონი 21 ქულით ჩამორჩა და ბედსაც შეეგუა. საბოლოოდ „გოლდენ სტეიტმა" 113:91 მოიგო.

გამარჯვებულთაგან ყველაზე შედეგიანი კევინ დურანტი იყო, 38 ქულით, 8 მოხსნითა და 8 პასით. „კლივლენდ კავალიერსიდან" კი ყველაზე მეტი - 28 ქულა ლებრონ ჯეიმსმა ჩააგდო. ამ მონაგარს მან 15 მოხსნაც დაუმატა, მაგრამ ლებრონის დღევანდელ თამაშს წარმატებულს მაინც ვერავინ დაარქმევს - კლივლენდელთა ლიდერის სროლის სიზუსტე 50%-ს არ აღემატებოდა. ამასთან, ბურთიც უჩვეულოდ ბევრჯერ დაკარგა.

ფინალური სერიის მეორე მატჩი 5 ივნისს, გამთენიას, ისევ „გოლდენ სტეიტ უორიორზის" არენაზე გაიმართება.

ლუკა ქარსალაძე, პრაიმნიუსჯორჯია