57 წლის ამერიკელი მხატვარი მაიკლ რუბინო 19 შვილს შეხვდა, რომლებიც მისი სპერმისგან ხელოვნური განაყოფიერების შედეგად დაიბადნენ. ამის შესახებ გამოცემა Inside Edition-ი წერს, რომელიც ამ შეხვედრის ორგანიზატორი იყო.

„როდესაც დონორი ვიყავი, ვფიქრობდი, რომ თუ გამიმართლებდა, ორ ან სამ შვილს მაინც შევხვდებოდი. მე ისინი დანახვისთანავე შემიყვარდნენ“, - ამბობს რუბინო.

მისი ბიოლოგიური შვილებიდან ყველაზე უფროსი 21 წლისაა, უმცროსი კი 16-ის. 11 მათგანს კი ისეთივე ცისფერი თვალები აქვთ, როგორც მამას.

ბავშვების დედები აშშ-ის 10 შტატსა და კაიმანის კუნძულებზე (დიდი ბრიტანეთი) ცხოვრობდნენ. რუბინო შვილების ფოტოებს თავისი მისაღები ოთახის თაროზე ინახავს.

მხატვარი ამტკიცებს, რომ ის დონორი ფინანსური მოსაზრებების გამო არ გამხდარა. მისი სურვილი იყო უნაყოფო წყვილებს დახმარებოდა. ყოველ შემოწირულობაზე მას 50 დოლარს უხდიდნენ. მაგრამ ის თანხას ქველმოქმედებაში ხარჯავდა.

რუბინომ სპერმის ბანკის ანკეტაში მიუთითა, რომ თავისი საკონტაქტო ტელეფონის დამალვას არ აპირებდა, რადგან იმედოვნებდა, რომ როდესაც ბავშვები გაიზრდებოდნენ, მის ნახვას მოისურვებდნენ.

გამოცემა The Orange County Register-ი წერდა, რომ ერთ-ერთი ბავშვის დედა მათ 2004 წელს დაუკავშირდა, როდესაც ბავშვი 6 წლის იყო. რუბინო დედას ეხმარებოდა, შვილი სკოლაში დაყავდა, მოგვიანებით კი მათ სახლში საცხოვრებლად გადავიდა.