არგენტინის ფეხბურთის ასოციაცია „მანჩესტერ სიტის“ მთავარი ტრენერის პეპ გვარდიოლას ეროვნული ნაკრების მწვრთნელად მიწვევას გეგმავს.

გავრცელებული ინფორმაციით, ფედერაციის ხელმძღვანელობა სპეციალისტს შესთავაზებს კონტრაქტს წელიწადში 12 მლნ დოლარით. აღნიშნულია, რომ თანხის ნახევარს ასოციაცია გადაიხდის, ნახევარს კი ბიზნესმენთა ჯგუფი.

არგენტინის ნაკრებმა ახლანდელი მწვრთნელის ხორხე სამპაოლის ხელმძღვანელობით მსოფლიო ჩემპიონატის მერვედფინალამდე მიაღწია, სადაც საფრანგეთთან 3:4 დამარცხდა. ჯგუფურ ეტაპზე სამხრეთამერიკელებმა ფრედ ითამაშეს ისლანდიასთან (1:1), ხორვატიასთან დამარცხდნენ (0 :3) და ნიგერიას მოუგეს (2:1).

სამპაოლისთან კონტრაქტი 2021 წლამდეა გათვლილი. თუ ფედერაცია 2019 წლამდე - ამერიკის თასის დაწყებამდე მასთან ხელშეკრულებას გააუქმებს, სპეციალისტი 20 მლნ დოლარის კომპენსაციას მიიღებს.