ოკუპირებული ცხინვალის იზოლატორში მყოფი მაია ოთინაშვილის დედის, გალინა ქელეხსაევას ინფორმაციით, მისი შვილი ნაცემია.ამის შესახებ გალინა ქელეხსაევამ "რადიო თავისუფლებას" განუცხადა. მისი თქმით, სწორედ ამის გამო არავის, მათ შორის ნათესავებს არ აძლევენ ცხინვალის იზოლატორში მაიას ნახვის უფლებას და პატიმრობიდან გათავისუფლებასაც იმიტომ აჭიანურებენ, რომ ძალადობის კვალი წაიშალოს. გალინა ქელეხსაევას ინფორმაციით, მისმა შვილმა საოკუპაციო ძალების წარმომადგენლებს წინააღმდეგობა დაკავებისას გაუწია, რის გამოც სცემეს. დაკავებულის დედა ვარაუდობს, რომ მაია ოთინაშვილს ფიზიკური შეურაცხყოფა მიაყენეს ცხინვალში გადაყვანის შემდეგაც. გალინა ქელეხსაევა „წითელი ჯვრის“ კომიტეტის წარმომადგენლებს სთხოვს, მისი ქალიშვილის ნახვა მოახერხონ.

ხურვალეთში მცხოვრები მაია ოთინაშვილი, რომელსაც სამი არასრულწლოვანი შვილი ჰყავს, რუსეთის საოკუპაციო ძალების წარმომადგენლებმა 29 სექტემბერს დააკავეს ე.წ. საზღვრის დარღვევისთვის. 2 ოქტომბერს, სამხრეთ ოსეთის დე ფაქტო რესპუბლიკის უშიშროების კომიტეტმა განაცხადა, რომ „ლენინგორის სასამართლომ“ ოთინაშვილს შეუფარდა ორთვიანი წინასწარი პატიმრობა. ამავე კომიტეტის მტკიცებით, მაია ოთინაშვილი ხანგრძლივი დროის განმავლობაში, გარკვეული თანხის სანაცვლოდ, საზღვრის უკანონოდ გადაკვეთაში ეხმარებოდა „სამხრეთ ოსეთის“ და საქართველოს მოქალაქეებს.

საქართველოს მთავრობაში აცხადებენ, რომ საერთაშორისო პარტნიორების მონაწილეობით ყველა ბერკეტია ამოქმედებული უკანონო პატიმრობიდან მაია ოთინაშვილის გასათავისუფლებლად.

საზოგადოებრივი მაუწყებლის ცნობით, კი ცხელი ხაზით მიღებული ბოლო ინფორმაციის თანახმად, დე ფაქტო ცხინვალის წარმომადგენელმა, ეგორ კოჩიევმა განაცხადა, რომ უკანონოდ დაკავებულ მაია ოთინაშვილს დე ფაქტო პროკურატურამ 10-დღიანი ე.წ. წინასწარი პატიმრობა შეუფარდა. ამის შესახებ პირველ არხს საქართველოს სახელმწიფო უსაფრთხოების სამსახურში განუცხადეს.

მათივე ცნობით, სახელმწიფო უსაფრთხოების სამსახურის მხრიდან არაერთხელ გააქტიურდა ცხელი ხაზი.

„სახელმწიფო უსაფრთხოების სამსახური იყენებს მის ხელთ არსებულ ყველა საშუალებას საქართველოს მოქალაქის უმოკლეს ვადებში გასათავისუფლებლად“, – აცხადებენ სუს-ში.