გრიპით ინფიცირებული პაციენტების რაოდენობამ შედარებით იკლო, თუმცა მნიშვნელოვანია, რომ ვირუსის შესაძლო მეორე ტალღას მომზადებულები შევხვდეთ. ამის შესახებ ბოჭორიშვილის კლინიკების ექიმებმა განაცხადეს.

მათი თქმით, გარდაცვალების შემთხვევების უმეტესობა თანმდევი დაავადებების გართულებამ გამოიწვია. ისინი რისკჯგუფებში მყოფი პაციენტებისთვის გრიპის აცრის რეკომენდაციას გასცემენ.

ექიმები ამბობენ, რომ შესაძლო მეორე ტალღისთვის შიშის საფუძველი არ არსებოს, თუმცა მოქალაქეებს სიფრთხილისა და ექიმების რეკომენდაციების გათვალისწინებისკენ მოუწოდებენ.

 „5-6 დღეა, რაც დაიწყო კლება, თუმცა მაინც 90-100-ს ფარგლებშია ორივე განყოფილებაში ავადმყოფთა რიცხვი, თუმცა ყველა არ არის, რა თქმა უნდა, გრიპი, მათ შორის არის სხვა დაავადებებიც. ასე, დაახლოებით, ჩვენთან ახლა, ამ წუთას იქნება 60-დან 70-მდე გრიპით დაავადებული. ამ წუთას ჩვენთან წევს 40 ბავშვი ავადმყოფი, ანუ აქაც არის კლება,“ - განაცხადა აკადემიკოს ვახტანგ ბოჭორიშვილის სახელობის სეფსისის და ინფექციური პათოლოლოგიის კლინიკის გენერალურმა დირექტორმა, დავით გადელიამ.

მედიცინის დოქტორის და ინფექციონისტის თქმით, ყველაზე მაღალი საფრთხის ქვეშ გრიპის ვირუსთან მიმართებაში დგანან ორსული ქალბატონები. მაია კანაშვილი მიიჩნევს, რომ რისკჯგუფებს განეკუთვნებიან ასევე თავად ექიმებიც, რომლებსაც უწევთ ყოველდრიური შეხება დაავადებულ პაციენტებთან.