თავდაცვის მინისტრმა ლევან იზორიამ ჟურნალისტებს დღეს სამოქმედო გეგმა წარუდგინა.

ლევან იზორიას თქმით, წელს მთავარი პრიორიტეტი ტოტალური თავდაცვის პრინციპის საფუძველზე თავდაცვის ძალების ორგანიზება იქნება. თავდაცვის მინისტრის განცხადებით, მარტის თვეში საქართველოში ნატოს გენერალური მდივანი ჩამოვა. 

 “2019 წლის მთავარი პრიორიტეტი იქნება თავდაცვის ძალების ტოტალური თავდაცვის პრინციპის საფუძველზე ორგანიზება, რაც გულისხმობს მთლიანი რესურსების  ჩართულობას ქვეყნის თავდაცვის ამოცანების განხორციელებისთვის, რაც გულისხმობს უფრო ინტენსიურ უწყებათა შორის თანამშრომლობას. უკვე დაანონსდა ნატო-ს გენერალური მდივნის ვიზიტი საქართველოში, მარტის თვეში, როდესაც ეს სწავლებები ჩატარდება. ასევე ველოდებით სამხედრო კომიტეტის ვიზიტს საქართველოში, ეს დინამიკა არის მართლაც შეუქცევადი,“ - განაცხადა ლევან იზორიამ.

ასევე მისი თქმით, თავდაცვის ძალების დაკომპლექტების პოლიტიკა მარტივდება. „ვისაც ადრე უნდოდა, რომ თავდაცვის ძალების წარმომადგენელი გამხდარიყო, სხვადასხვა ლოკაციაზე უწევდა მისვლა, რათა გარკვეული ნორმატივები ჩაებარებინა. ახლა მოთხოვნებს ვამარტივებთ, მათ შორის ვამარტივებთ ფიზიკური მომზადების კუთხით სტანდარტებს. შესაბამისად, პირს, რომელიც საბრძოლო მომზადებას გაივლის, შესაძლებლობა ექნება, მომზადების პერიოდში მიაღწიოს სტანდარტს და გახდეს თავდაცვის ძალების წარმომადგენელი.

რაც შეეხება უშუალოდ საბუთების შეგროვებას, თუ ეს მხოლოდ ერთ ლოკაციაზე იყო შესაძლებელი, ჩვენ რეგიონული პრინციპის მიხედვით გავშალეთ და ახლა დოკუმენტების წარდგენა ექვს ადგილზე იქნება შესაძლებელი. მათი შერჩევა გამარტივებული წესით მოხდება, რაც ხელს შეუწყობს მეტი დაინტერესებული პირის თავდაცვის ძალებში მიღებას“, – განაცხადა ლევან იზორიამ.