ბრიტანულმა გამოცემამ The Guardian-მა ინტერვიუ გამოაქვეყნა პირველი ქართული გეი ფილმის - And Then We Danced/და ჩვენ ვიცეკვეთ - რეჟისორთან ლევან აკინთან.

ინტერვიუში ლევან აკინი საუბრობს იმაზე, თუ რა პრობლემები და დაბრკოლებები შეექმენა მას ამ ფილმის გადაღებისას.

როგორც აკინი აცხადებს, ფილმის გადაღებამდე, გადამღები ჯგუფი იმყოფებოდა ქართული ნაციონალური ბალეტის ხელმძღვანელ ნინო სუხიშვილთან, რომელმაც დაიწუნა ფილმის თემატიკა.

"გადაღებამდე, ჩვენ შევხვდით ნინო სუხიშვილს, ქართული ნაციონალური ბალეტის ხელმძღვანელს და მისი რეაქცია იყო შემდეგნაირი: „ და რატომ არ შეიძლება მას [ფილმის გმირს] გოგო შეუყვარდეს? ქართულ ცეკვაში გეი არ არსებობს". ჩვენ შეგვეძლო მისი დახმარება გამოგვეყენებინა, თუმცა მან მხარი არ დაგვიჭირა. თუმცა ეს ყველაფერი არ არის. როგორც მოგვიანებით გაირკვა, ის დაუკავშირდა სხვა ცეკვის სტუდიებს და დაბლოკა მოცეკვავეები, თუ ისინი ფილმში გამოჩნდებოდნენ, ცეკვის შესაძლებლობას აღარ მისცემდა", - ამბობს აკინი ინტერვიუში.

რეჟისორი ასევე საუბრობს ქართული კინოს ეროვნული ცენტრის შესახებ. მისი თქმით, ცენტრმა, ფილმის თემატიკის გათვალისწინებით, არ მიიღო მონაწილეობა ფილმის შექმნაში და არც კანის კინოფესტივალზე მის წარდგენაში მიუღია რაიმე სახის მონაწილეობა.