ევროპალიგის საკვალიფიკაციო ეტაპზე ქუთაისის "ტორპედომ" პირველი მატჩი გამართა და ყაზახეთში "ორდაბასთან" მინიმალური სხვაობით, 0:1 დამარცხდა .საპასუხო მატჩი თბილისში, მიხეილ მესხის სახელობის სტადიონზე გაიმართება.

მატჩის შემდეგ, პრესკონფერენციაზე "ტორპედოს" მთავარი მწვრთნელი კახა ჩხეტიანი ქართულ ენაზე საუბრობდა, იმის მიუხედავად, რომ მან რუსული ენა კარგად იცის. ადგილობრივი ჟურნალისტები დაინტერესდნენ, თუ რატომ პასუხობდა მათ შეკითხვებს ჩხეტიანი ქართულ ენაზე.

"ვიცით, რომ რუსულ ენას კარგად ფლობთ, მაგრამ ქართულად გვესაუბრებით. რატომ?" - იკითხეს ჟურნალისტებმა. 

"ქართული ენა უძველესი და ძალიან ლამაზია. ამიტომ, ყველას უნდა ესმოდეს. ძალიან მიყვარს ჩემი ქვეყანა, პატივს ვცემ მშობლიურ ენას და ამიტომ ვსაუბრობ ქართულად", - უპასუხა ჩხეტიანმა.