დედოფლისწყაროში ძველ ამორტიზებულ საავადმყოფოს ახალი სტაციონარი ჩაანაცვლებს. სამუშაო პროცესი საქართველოს რეგიონული განვითარებისა და ინფრასტრუქტურის მინისტრის მოადგილემ ეკა სეფაშვილმა, შ.პ.ს. „სახელმწიფო სამშენებლო კომპანიის“ დირექტორთან იოსებ ოზაშვილთან და ადგილობრივი ხელისუფლების წარმომადგენლებთან ერთად მოინახულა.

საქართველოს რეგიონული განვითარებისა და ინფრასტრუქტურის სამინისტროს შ.პ.ს. „სახელმწიფო სამშენებლო კომპანია“ დედოფლისწყაროში ახალ მრავალპროფილურ საავადმყოფოს 2014 წლიდან აშენებს. პროექტის მიხედვით საავადმყოფოს შენობა ერთსართულიანი იქნება თანამედროვე დიზაინითა და კეთილმოწყობილი ეზოთი. ახალი მრავალპროფილური კლინიკა დედოფლისწყაროსა და ირგვლივ მდებარე 16 სოფლის 32 531 მცხოვრებს მოემსახურება. სტაციონარი უახლესი ტექნიკით აღიჭურვება და პაციენტებს ყველა ტიპის სამედიცინო მომსახურებას გაუწევს.

პროექტი სახელმწიფო და მუნიციპალური ბიუჯეტებიდან ფინანსდება და მისი ღირებულება 3 მლნ 700 ათას ლარია. ამ ეტაპზე მშენებლობაზე 24 ადამიანია დასაქმებული.

მრავალპროფილური საავადმყოფოს მშენებლობა დედოფლისწყაროში მიმდინარე წლის დეკემბერში დასრულდება.