საპარლამენტო უმრავლესობის წევრის, დავით მათიკაშვილის განცხადებით, ჩორჩანასთან ბლოკპოსტის არსებობა უსაფრთხოების ზომებს ეხება და ქვეყნის უსაფრთხოებისთვის მნიშვნელოვანია. მისივე თქმით,  რუსეთი საქართველოს ოკუპირებულ ტერიტორიებთან დაკავშირებით თავის პროვოკაციულ ქმედებებს აგრძელებს.

როგორც ჟურნალისტებს მათიკაშვილმა განუცხადა,  პოლიციური ბლოკპოსტის არსებობის თაობაზე ქართული მხარე გადაწყვეტილებას არ შეცვლის.

„ამავდროულად, ყველა საერთაშორისო პარტნიორთან ვიმუშავებთ და ყველა ფორმატს გამოვიყენებთ, რომ რაიმე სახის ესკალაცია არ მოხდეს. ბლოკპოსტის არსებობა უსაფრთხოების ზომებს ეხება და ჩვენი ქვეყნისთვის უსაფრთხოებისთვის მნიშვნელოვანია“, – განაცხადა მათიკაშვილმა.

სოფელ ჩორჩანას საგუშაგოსთან დაკავშირებით ცხინვალის საოკუპაციო რეჟიმის წარმომადგენლების მოთხოვნის ვადა ამოიწურა. მათ ქართული პოსტის გაუქმება 30 აგვისტოს 06:00 საათამდე მოითხოვეს.