მსოფლიო ანტიდოპინგურმა სააგენტომ (WADA) რუსეთს დიდ საერთაშორისო ტურნირებზე ასპარეზობა ოთხი წლით აუკრძალა.

რუსეთს ამიერიდან ოთხი წლის განმავლობაში ეკრძალება საერთაშორისო ასპარეზობების  გამართვა, დიდ ტურნირებში მონაწილეობას მხოლოდ „სუფთა“ სპორტსმენები ნეიტრალური სტატუსით შეძლებენ. რუსეთის ნაკრები ასევე ვერ შეძლებს თავისი დროშის ქვეშ ასპარეზობას.

რუსეთის ეროვნული ოლიმპიური კომიტეტის ხელმძღვანელობას, მათ შორის აღმასრულებელი კომიტეტის წვერებს, ეკრძალებათ დიდ საერთაშორისო ტურინირებზე დასწრება ოთხი წლის განმავლობაში.

რუსეთის ანტიდოპინგური სააგენტოს დირექტორის მოადგილის მარგარიტა პახნოცკაის თქმით, WADA-ს აღმასრულებელმა კომიტეტმა ყველა რეკომენდაცია გაითვალისწინა  და მისმა წევრებმა გადაწყვეტილება ერთხმად მიიღეს.

WADA-ს გადაწყვეტილება, საარბიტრაჟო სასამართლოში აპელაციის განხილვიდან 21 დღის შემდეგ შევა ძალაში.

2015 წელს WADA-მ რუსეთი ანტიდოპინგური წესების მრავალრიცხოვან დარღვევაში დაადანაშაულა, შეაჩერა მოსკოვის ანტიდოპინგური ლაბორატორიის მუშაობა, ასევე გამოიტანა გადაწყვეტილება  რუსეთის ანტიდოპინგური კოდექსისა და ორგანიზაციის კოდექსის შეუსაბამობის შესახებ.

სექტემბერში WADA-მ  რუსეთის ანტიდოპინგური სააგენტოსთვის სტატუსის ჩამორთმევის პროცედურა დაიწყო მოსკოვის ანტიდოპინგური ლაბორატორიის მონაცემების შესაძლო მანიპულაციასთან დაკავშირებით.