საქართველოს საფეხბურთო ნაკრებმა ერთა ლიგის C დივიზიონის მე-2 ჯგუფში ბოლოსწინა მატჩი ჩაატარა და სომხეთთან 1:2 დამარცხდა. ქართველმა ფეხბურთელებმა ძალიან უსახურად ითამაშეს და ერთადერთი გოლი პენალტით გაიტანეს, რომელიც რბილად რომ ვთქვათ, ძალიან საეჭვო იყო.

ვლადიმირ ვაისმა მაკედონიელებთან მატჩის მერე, სასტარტო შემადგენლობაში ერთბაშად 9 ცვლილება განახორციელა და მინდორზე მხოლოდ კაპიტანი ჯაბა კანკავა და ვაკო გვილია დატოვა. ამასთან, განაცხადში საერთოდ ვერ მოხვდა ნაკრების ერთ-ერთი ლიდერი თორნიკე ოქრიაშვილი. თავის მხრივ, საქართველოში მთავარი ფეხბურთელის გარეშე ჩამოვიდა სომხეთის ნაკრები. ჰენრიხ მხითარიანს იტალიურმა რომამ კარანტინის დატოვების უფლება არ მისცა.
33-ე წუთზე პირველი გოლი მასპინძელთა კარში კვიპროსული აელ-ის ფორვარდმა გევორქ ღაზარიანმა გაიტანა.

ქართველმა ფეხბურთელებმა საპასუხო ბურთი 65-ე წუთზე პენალტით გაიტანეს. შეცვლაზე შესულმა ვაკო ყაზაიშვილმა პენალტი ზუსტად შეასრულა და ანგარიში 1:1 გახდა.

სტუმრები 86-ე წუთზე დაწინაურდნენ. გერმანული ჰოფენჰაიმის თავდამსხმელმა სარგის ადამიანმა მეორე გოლი გაიტანა.
საქართველოს ნაკრებს ერთა ლიგის მიმდინარე გათამაშებაში ერთადერთი მატჩი დარჩა ჩასატარებელი. 18 ნოემბერს ქართველი ფეხბურთელები კვლავ თბილისში ესტონეთს შეხვდებიან, რაც სლოვაკი ვლადიმირ ვაისისთვის საქართველოს ნაკრებში ბოლო შეხვედრა იქნება.