აშშ-ის დაავადებათა კონტროლისა და პრევენციის ცენტრმა გაავრცელა განცხადება, სადაც მოქალაქეებს ურჩებს არ აკოცონ ქათმებს სალმონელათი დაინფიცირების საფრთხის გამო.

ამერიკელებს მოუწოდებენ კარგად დაიბანონ ხელები ფრინველებთან კონტაქტის შემდეგ და ბავშვებს მათთან მიკარების უფლება არ მისცენ.

43 შტატში დაინფიცირდა 163 ადამიანი. სპციალისტები ვარაუდობენ, რინ ისინი შინაურ ფრინველებთან კონტაქტის შედეგად დაავადნენ. ცენტრის მონაცემებით, დაავადებულთა მესამედი ხუთ წლამდე ასაკის ბავშვია. თებერვლის შემდეგ კლინიკებში მოხვდა 34 ადამიანი. გარდაცვალების შემთხვევა არ დაფიქსირებულა.

დაავადებათა ცენტრი ამერიკელებს აფრთხილებს, რომ ქათმები ან იხვები, შესაძლოა, დაავადების მატარებლები იყვნენ, იმ შემთხვევაშიც კი თუ ისინი გარეგნულად ჯანმრთელად გამოიყურებიან. ბაქტერიები, შესაძლოა, ადვილად გავრცელდეს, მათ ადგილსამყოფელში.

დაავადებას ახასიათებს ტემპერატურის მატება, ტკივილი მუცლის არეში, დიარეა და ღებინება. ადამიანთა უმეტესობა თავისით იკურნება, თუმცა მძიმე შემთხვევებში სალმონელამ, შესაძლოა, ლეტალური გამოსავალი გამოიწვიოს.