ბრიტანეთის პრემიერ-მინისტრი ბორის ჯონსონი თავის საცოლეზე, კერი საიმონდსზე დაქორწინა.

პრემიერ-მინისტრის პრესსპიკერის განცხადებით, წყვილმა ჯვარი უესტმინსტერის კათედრალში შაბათს, შუადღეს დაიწერა. მისივე ინფორმაციით, ცერემონიალი ვიწრო წრეში ჩატარდა.

როგორც პრესსპიკერმა დასძინა, ჯონსონი და საიმონდსი თავიან ქორწინებას კიდევ ერთხელ, უფრო ფართო წრეში მომავალ ზაფხულს იზეიმებს.

ბორის ჯონსონი ბრიტანეთის პირველი პრემიერ-მინისტრია ბოლო 200 წლის განმავლობაში, რომელიც თანამდებობაზე ყოფნის დროს დაქორწინდა.

ბოლო პრემიერ-მინისტრი, რომელიც თანამდებობაზე ყოფნის დროს დაქორწინდა, რობერტ ჯენკინსონი იყო. ის პრემიერ-მინისტრის თანამდებობაზე 1812-1827 წლებში მუშაობდა.

ბორის ჯონსონისა და კერი საიმონდსის რომანტიკული ურთიერთობა 2019 წლის დასაწყისში დაიწყო. კერი საიმონდსი კონსერვატიული პარტიის პრესსამსახურში მუშაობდა, რომელსაც 2010 წელს შეუერთდა. ორი წლის შემდეგ, საიმონდსი ჯონსონის საარჩევნო კამპანიაში მუშაობდა, როდესაც ლონდონის მერად აირჩიეს.

მოგვიანებით, კერი საიმონდსი კონსერვატიული პარტიის კომუნიკაციების დირექტორი გახდა. 2018 წელს საიმონდსმა დატოვა თანამდებობა.

2020 წლის თებერვალში, წყვილმა თავისი რომანტიკული ურთიერთობა გაასაჯაროვა და განაცხადა, რომ ბავშვს ელოდებიან. გასული წლის აპრილში, მათ ვაჟი შეეძინათ.
ბორის ჯონსონს წინა ქორწინებიდან 4 შვილი ჰყავს.