Amazon-ისა და აეროკოსმოსური კომპანია Blue Origin-ის დამფუძნებელი ჯეფ ბეზოსი, ძმასთან, მარკ ბეზოსთან ერთად კოსმოსში გაფრინდება.

 „ხუთი წლიდან კოსმოსში მოგზაურობაზე ვოცნებობდი. 20 ივლისს ავიხდენ ოცნებას და ვიმოგზაურებ ჩემს ძმასთან ერთად. დიდებული მოგზაურობა იქნება საუკეთესო მეგობართან ერთად“, - დაწერა ბეზოსმა ინსტაგრამზე.

ბეზოსები Blue Origin-ის მიერ შექმნილი ხომალდ  New Shepard-ით გაფრინდებიან. ეს არის ერთეტაპიანი რაკეტა მოკლე სუბორბიტალური ტურისტული ფრენისთვის დედამიწის ატომოსფეროს მიღმა. მანამდე Blue Origin-მა ათჯერ გამოსცადა რაკეტა, თუმცა კაფსულაში ადამიანი ამ დრომდე არ მჯდარა.

რაკეტა სამგზავრო კაფსულით რამდენიმე ათეულ კილომეტრზე აფრინდება. შემდეგ მოწყობილობა კოსმოსურ ტურისტებთან ერთად განცალკევდება და რამდენიმე ხნის განმავლობაში გადაკვეთს კოსმოსის პირობით საზღვარს 100 კმ-ის სიმაღლეზე. მგზავრები გარკვეული დროით უწონობაში დარჩებიან. შემდეგ კაფსულა ქვემოთ დაიწყებს მოძრაობას და პარაშუტების დახმარებით დაეშვება.

5 მაისს Blue Origin-მა განაცხადა, რომ მოგზაურებთან ერთად ხომალდს 20 ივლისს გაუშვებდა. ამასთან გამოცხადდა, რომ ერთ ბილეთს აუქციონზე გაყიდდნენ.

ასევე CNBC -ის ცნობით, ხომალდით კოსმოში ონლაინ-აუქციონის გამარჯვებული გაფრინდება. აუქციონი 10 ივნისს დასრულდება. ამ მომენტისთვის ყველაზე დიდი ფსონი 2,8 მლნ დოლარს შეადგენს.