კანის 74-ე კინოფესტივალის მთავარი პრიზი -  ოქროს პალმის რტო გადაეცა ფრანგი რეჟისორის ჟულია დიუკორნოს ფილმს „ტიტანი“. ეს არის სერიული მკვლელი გოგოს ამბავი, რომლის სექსუალური პარტნიორებიც ავტომობილები არიან. აგატა რუსელის გმირი სწორედ ავტომობილისაგან დაორსულდება.

კინოფესტივალის გრან-პრი მოიპოვა ორმა ნამუშევარმა: ირანელი რეჟისორის ასგარ ფარჰადის ფილმმა „გმირი“ და ფინელი რეჟისორის იუჰო კუოსმანენის კონოსურათმა „კუპე ნომერი ექვსი“.

საუკეთესო რეჟისურისთვის ჯილდო მიიღო ფრანგმა რეჟისორმა ლეოს კარაკსმა ფილმისთვის „ანეტი“.

მამაკაცის როლის საუკეთესო შესრულებისთვის პრიზი გადაეცა ლენდრი ჯონსს ავსტრალიელი რეჟისორის ჯასტინ კურზელის ფილმ „ნიტრამში“ შესრულებული როლისთვის. ქალის  როლის საუკეთესო შესრულებისთვის კი ჯილდო წილად ხვდა რენატე რეინსვეს ნორვეგიელი რეჟისორის იოაკიმ ტრიერის ფილმისთვის „ყველაზე საშინელი ადამიანი დედამიწაზე“.

საუკეთესო სცენარისთვის ჯილდო გადაეცა იაპონურ ფილმს „დაჯექი ჩემი მანქანის საჭესთან“, რომლის რეჟისორია რიუსუკე ჰამაგუჩი, მან ჰარუკი მურაკამის ნაწარმოების ეკრანიზაცია წარმოადგინა.

ჟიურის პრიზი ერგო ორ სურათს - ისრაელელ რეჟისორის ნადავა ლაპიდისა და ტაილანდელი რეჟისორის აპიჩატპონგი ვირასეტაკულას ნამუშევრებს.

კანის 74-ე საერთაშორიოს კინოფესტივალი წელს 6-17 ივლისს გაიმართა.