Saint Laurent-მა და Brioni-მა მიიღეს გადაწყვეტილება თავიანთ პროდუქციის დამზადებისას არ გამოიყენონ ნატურალური ბეწვი. იუწყება AFP.

სააგენტო აღნიშნავს, რომ Saint Laurent-ი და Brioni კომპანია Kering-ის ბოლო ორი ბრენდი იყო, რომლებიც ჯერ კიდევ იყენებდნენ ბუნებრივ ბეწვს. მანამდე მასზე უარი თქვეს ამ კორპორაციის კუთვნილმა ბრენდებმა Gucci-მ, Balenciaga-მ, Bottega Veneta-მ და Alexander McQueen-მა.

Kering-ის ვებგვერდზე გამოქვეყნებულ განცხადებში ნთქვამია, რომ „ჯგუფის არც ერთი სახლი (მოდის) არ გამოიყენებს ბეწვს 2022 წლის შემოდგომის კოლექციის დაწყებიდან“.

მოდის სახლები მრავალი წლის განმავლობაში კრიტიკის ქარცეცხლში ექცევიან ცხოველთა დაცვის სხვადასხვა ორგანიზაციის მხრიდან, რომლებიც აპროტესტებენ ტანსაცმლის დამზადებისას ნატურალური ბეწვის გამოყენებას, ასევე ბეწვიანი ცხოველების მოშენებას და მათი დაკვლის მეთოდს. ამ მხრივ განსაკუთრებით რადიკალურია ასოციაცია PETA(ადამიანები ცხოველებისადმი ეთიკური მოპყრობისთვის).

მისი წარმომადგენლები შლიან მოდის ჩვენებებს, საღებავს ასხამენ მოდელებს, რომლებიც ქურქებს წარადგენენ და მაკრატლით ჭრიან ბეწვეულს. პარიზში მრავალრიცხოვანი მანიფესტაციების აქტივისტები ტანზე ისხამდნენ წითელ სითხეს და ამით გამოსახავდნენ დასახიჩრებულ და ნაწამებ ცხოველებს.

ბევრმა ცნობილმა მოდის სახლმა, მაგალითად, Chanel-მა ჯერ კიდევ რამდენიმე წლის წინ უარი თქვა ბუნებრივი ბეწვის გამოყენებაზე.