შუალედური სამთო მომზადების ზამთრის კურსი გუდაურში
გუდაურში საჩხერის სამთო მომზადების სკოლის შუალედური სამთო მომზადების ზამთრის კურსის მეორე ეტაპი დასასრულს უახლოვდება. „ნატოს პარტნიორობა მშვიდობისათვის“ პროგრამის ფარგლებში (PFP) მიმდინარე კურსის მთავარ მიზანს ნატოს წევრი და პარტნიორი ქვეყნების სამხედროების მიერ თოვლიან რელიეფზე სამთო ტექნიკის დახვეწა და ინსტრუქტორის დონეზე გადმოცემა წარმოადგენს.
ქართველ ჯარისკაცებთან ერთად თურქეთიდან, ლატვიიდან, სომხეთიდან და უკრაინიდან მოვლენილმა სამხედროებმა სწავლება თოვლიან რელიეფზე დაბრკოლებათა ზოლის გადალახვაში გაიარეს. კურსის ფარგლებში მათ ისეთი ამოცანები შეასრულეს, როგორიცაა გაუკვალავ თოვლში სრიალი, თოკში ჩაბმული სრიალი, ზვავში მოყოლილი ადამიანის ძებნა, გადარჩენა და ევაკუცია, ასევე უახლოეს სამედიცინო პუნქტამდე მიყვანა, თოვლში თავშესაფრის მოწყობა და ღამის გათენება, ზვავსაშიშ ადგილებში თოვლის საფარის შემოწმება და ზვავის რისკების დადგენა. მსმენელებს საძებნი ხელსაწყოს A8 გამოყენებით ზვავში მოყოლილი ადამიანის აღმოჩენაც მოუწიათ.
კურსს პოლკოვნიკ ბესიკ ქუთათელაძის სახელობის საჩხერის სამთო მომზადების სკოლის ინსტრუქტორები ზედამხედველობენ. სწავლების წარმატებით დასრულების შემთხვევაში სამხედროები სერტიფიკატებსა და სამკერდე ნიშნებს მიიღებენ. მათ ასევე მიეცემათ ჯგუფის უფროსის კურსზე დასწრების რეკომენდაცია.
საჩხერის სამთო მომზადების სკოლის მეთაურის, მაიორ ივანე ცხადაძის თქმით, კურსზე მიღებული ცოდნა სამხედრო მოსამსახურეებს საშუალებას მისცემს გადალახონ საქართველოს ტერიტორიაზე არსებული მაღალი მთები, საჭიროების შემთხვევაში მოაწყონ თავშესაფრები და თავი გაართვან მათზე დაკისრებულ ამოცანას.
როგორც კურსში მონაწილე ნატოს წევრი და პარტნიორი ქვეყნების სამხედრო მოსამსახურეებმა აღნიშნეს, მათ სწავლების დროს სამთო ტექნიკა დახვეწეს, მიღებული ცოდნა კი საკუთარ ქვედანაყოფებში გამოადგებათ. „თურქეთის შეიარაღებული ძალების სამთო ქვედანაყოფში ვმსახურობ. ის სამთო უნარ-ჩვევები, რაც აქ შევისწავლე ჩემს ქვეყანაში გამომადგება. ამ კურსმა ნამდვილად დიდი გამოცდილება მომცა,“ - განაცხადა თურქეთის შეიარაღებული ძალების სამთო ქვედანაყოფის სამხედრო მოსამსახურემ, მთავარმა სერჟანტმა ბულატ ზენგინმა.
შუალედური სამთო მომზადების ზამთრის კურსის პირველი ეტაპი ახალციხეში, ორფოლოს სასროლეთზე გაიმართა, სადაც სამხედროებმა მთიან რელიეფზე საშტატო იარაღიდან სროლის ტექნიკა დახვეწეს. სროლების დროს მათ მზის მდგომარეობის, ზღვის დონიდან სიმაღლის, ქარის მიმართულებისა და სიჩქარის, ასევე ტენიანობის გათვალისწინება მოუხდათ.
შუალედური სამთო მომზადების ზამთრის კურსი 12 თებერვალს დასრულდება.
