ამერიკელ მსახიობ ალეკ ბოლდუინს ფილმ Rust-ის გადამღები ჯგუფის კიდევ ერთი წევრი, სცენარისტის თანაშემწე მემი მიტჩელი უჩივის.

ალეკ ბოლდუნის საწინააღმდეგო სარჩელში ნათქვამია, რომ ფილმის სცენარში პისტოლეტიდან სროლის ეპიზოდი არ ყოფილა. იუწყება BBC.

მემი მიტჩელმა ალეკ ბოლდუინს, ფილმის პროდიუსერსა და იარაღის ტექნიკოსს უჩივლა. მისი თქმით, სცენარის მიხედვით, ბოლდუინს არ უნდა გაესროლა.

 „სცენარში არაფერი იყო ნათქვამი, რომ ბოლდუინს ან ვინმე სხვას იარაღიდან უნდა გაესროლა. მსახიობმა ჩემთვის აუხსნელი მიზეზით რუსული რულეტკის თამაში გადაწყვიტა. ბატონო ბოლდუინისა და პროდიუსერების უპასუხისმგებლო ქმედებებს ჰალინა ჰატჩინსის სიცოცხლე შეეწირა. საშინელება იყო, დღემდე ჩამესმის იარაღის გასროლის ხმა". – ამბობს მიტჩელი.

ბოლდუინს კომენტარი ჯერ არ გაუეთებია.

სასამართლოს მასალებში ნათქვამია, რომ იარაღი, რომელიც ფუჭი ვაზნებით უნდა ყოფილიყო დატენილი, ბოლდუინს რეჟისორის თანაშემწემ, დეივ ჰოლსმა გადასცა და უთხრა, რომ უსაფრთხო იყო. რეალურად მჭიდში საბრძოლო ვაზნები იდო.  

ფილმის გადასაღებ მოედანზე ტრაგედია 21 ოქტომბერს მოხდა. ბოლდუინმა, რომელიც მთავარ როლს ასრულებდა, იარაღიდან გაისროლა, რომელიც ფუჭის ნაცვლად, საბრძოლო ტყვიებით დატენილი აღმოჩნდა. ინციდენტის შედეგად დაიღუპა კინოოპერატორი ჰალინა ჰატჩინსი, რეჟისორი ჯოელ სოუზა კი დაიჭრა.