"აფხაზეთი ირანთან კავშირების ეტაპობრივი გაფართოებისთვის მზად არის", - განაცხადა ოკუპირებული აფხაზეთის ე.წ. საგარეო საქმეთა მინისტრმა ინალ არძინბამ. ამის შესახებ მან სოხუმში რუსეთის "ელჩთან", მიხეილ შურგალინთან შეხვედრისას თქვა.

"ჩვენ მზად ვართ, ირანთან ჩვენი კავშირების ეტაპობრივი გაფართოებისთვის. ჩვენ ვხედავთ ჩვენი ურთიერთობების განვითარების სერიოზულ პერსპექტივებს. დღეს ირანის მნიშვნელოვანი როლი გლობალური უსაფრთხოების სისტემაშია", - თქვა არძინბამ.

8 ნოემბერს მოსკოვში ირანის საელჩოს აფხაზეთისა და სამხრეთ ოსეთის ე.წ. საგარეო საქმეთა სამინისტროების ხელმძღვანელები ეწვივნენ. ინალ არძინბამ და ახსარ ჯიოევმა ირანის ელჩს რუსეთში კაზემ ჯალალის ტერორისტული აქტის შედეგად 15 ადამიანის დაღუპვა მიუსამძიმრეს. არძინბამ საელჩოში ვიზიტის კომენტირებისას აღნიშნა, რომ "აფხაზეთისთვის საინტერესოა ირანის სახელმწიფოს განვითარებაზე დაკვირვება".