კატარში მიმდინარე მსოფლიო ჩემპიონატზე კიდევ ერთი სენსაცია დაფიქსირდა: მეოთხედფინალში ერთმანეთს მაროკო და პორტუგალია დაუპირისპირდნენ. აფრიკელებმა პორტუგალიაც დაამარცხეს და მსოფლიო ჩემპიონატის 1/2-ფინალში გავიდნენ.

მაროკოელებმა გოლი პირველი ტაიმის 42-ე წუთზე გაიტანეს. აფრიკული გუნდი ენ-ნესირმა დააწინაურა.

პორტუგალიის ნაკრების მწვრთნელმა მეორე ტაიმში მოედანზე რონალდო გამოიყვანა. ეს იყო კრიშტიანო რონალდოს 196-ე მატჩი პორტუგალიის ნაკრებში. იგი ყველა დროის რეკორდსმენ ქუვეითელ ბადერ ალ-მუტავას გაუთანაბრდა.

პორტუგალიელებმა თამაშის შემოტრიალება მაინც ვერ მოახერხეს. მაროკო კი მომდევნო ეტაპზე გავიდა.

ნახევარფინალში აფრიკელები ინგლისი-საფრანგეთის მატჩში გამარჯვებულს შეხვდებიან.