ფიგურულ სრიალში ევროპის 2023 წლის ჩემპიონი ანასტასია გუბანოვა არ მიიღებს მონაწილეობას შოუში („ფიგურულ სრიალზე შეყვარებულები“), რომელიც 14 თებერვალს მოსკოვში გაიმართება. ეს ინფორმაცია რუსულმა პრესამ საქართველოს ფიგურული სრიალის ფედერაციაზე დაყრდნობით გაავრცელა.

მანამდე მედიაში გავრცელდა ინფორმაცია, რომ გუბანოვა გამოვიდოდა აღნიშნულ შოუში, რომლის ორგანიზატორია მოსკოვის სპორტის დეპარტამენტი.

„ანასტასია გუბანოვა და საქართველოს ნაკრების სხვა წევრები ნებისმიერ ღონისძიებაში მონაწილეობას იღებენ მხოლოდ საქართველოს ფიგურული სრიალის ფედერაციის ხელმძღვანელობასთან შეთანხმებით. საქართველოს ფიგურული სრიალის ფედერაციას არ მიუღია გადაწყვეტილება ანასტასია გუბანოვას აღნიშნულ ღონისძიებაზე გამოსვლის შესახებ“, – წერია ფედერაციის განცხადებაში.

 გუბანოვა საქართველოს ნაკრებში 2021 წლის აგვისტიდან გამოდის. 2023 წლის იანვარში მან ფინეთის ქალაქ ეპოოში ევროპის ჩემპიონის ტიტული მოიპოვა ქალთა ასპარეზობაში.