ევროპაში რეკორდული სიცხები ისევ ფიქსირდება. საფრანგეთში მაღალი ტემპერატურის გამო ბოლო 5 დღეში 1 000-მდე ადამიანი დაიღუპა.

ბალკანეთში კი მასშტაბური ტყის ხანძრები მძვიმვარებს, რასაც ინფრასტრუქტურასთან დაკავშირებით შეფერხებები მოჰყვა. იუწყება Reuters.

საფრანგეთში საზოგადოებრივი ჯანდაცვის სააგენტოს მონაცემებით, დაღუპულთა უმეტესობა ხანდაზმული ადამიანები არიან.

მძიმე ვითარებაა ბალკანეთშიც. ხორვატიაში სინოპტიკოსებმა უმაღლესი, წითელი საფრთხის დონე გამოაცხადეს დედაქალაქ ზაგრებში, ასევე პოპულარულ ტურისტულ ქალაქებში - სპლიტსა და დუბროვნიკში.

ამავე დროს, ადრიატიკის ზღვაში მდებარე კუნძულ ვისზე ტყის მასშტაბურ ხანძარს ათობით მეხანძრე ებრძვის.

სერბეთში უახლოეს საათებში ტემპერატურა შესაძლოა 39 გრადუსამდე გაიზარდოს.

იტალიაში სიცხის გამო წითელი საფრთხის დონე ქვეყნის 22 ქალაქში მოქმედებს - ჩრდილოეთის ბოლცანოდან სიცილიის ქალაქ პალერმომდე.

Reuters-ის ინფორმაციით, სიცხის ტალღა, რომელიც ევროპაში 20 ივნისიდან გრძელდება, უკვე არაერთი რეკორდის მიზეზი გახდა ზაფხულის დასაწყისისთვის. მაღალი ტემპერატურის გამო ენერგეტიკული ინფრასტრუქტურის მუშაობა შეფერხდა, სატრანსპორტო ქსელი დაზიანდა და ჯანდაცვის სისტემებზე დატვირთვა მნიშვნელოვნად გაოზარდა. სინოპტიკოსები ვარაუდობენ, რომ დასავლეთ ევროპაში ტემპერატურის ხანმოკლე შემცირების შემდეგ, მომდევნო კვირაში სიცხე კვლავ გაძლიერდება.