ვაკის პარკში დახვრეტილი ქართველი სამხედროები გაიხსენეს
ვაკის პარკის მედიათეკაში 1923 წლის 21 მაისს დახვრეტილი ქართველი სამხედროების მემორიალური დაფების პრეზენტაცია გაიმართა. ღონისძიებას საქართველოს შეიარაღებული ძალების გენერალური შტაბის უფროსის მოადგილეები, პოლკოვნიკები - ომარ ბეგოიძე და ნიკოლოზ აგლაძე დაესწრნენ. ღონისძიება ეროვნული გვარდიის სამხედრო-საჩვენებელი ორკესტრის მიერ შესრულებული სამგლოვიარო მარშითა და საქართველოს ეროვნული ჰიმნით გაიხსნა.
პოლკოვნიკმა ომარ ბეგოიძემ სიტყვით გამოსვლისას მსგავსი ინიციატივის მნიშვნელობაზე, დაღუპული სამხედროების ღვაწლსა და მათი გმირობის ისტორიის გახსენების საჭიროებაზე ისაუბრა.
რუსეთის ხელისუფლების მიერ ანტისაბჭოთა აჯანყების მოწყობის მცდელობისთვის ქართველი ოფიცრების დახვრეტიდან 93 წელი გავიდა. ბოლშევიკური რუსეთის ხელისუფლებამ 1923 წლის 21 მაისს ვაკის პარკის ტერიტორიაზე 15 ქართველი სამხედრო დახვრიტა.
მემორიალური დაფის პრეზენტაციაზე ეროვნული სასწავლო ცენტრ „კრწანისის“ მეთაური, პოლკოვნიკი გრიგოლ ჭელიძე, საქართველოს შეიარაღებული ძალების სხვა წარმომადგენლები და ეროვნული თავდაცვის აკადემიის იუნკერები იმყოფებოდნენ. ღონისძიება საქართველოს თავდაცვის სამინისტროს, თბილისის მერიის, ინფორმაციის თავისუფლების განვითარების ინსტიტუტის (IDFI) და საქართველოს შინაგან საქმეთა სამინისტროს (არქივთან თანამშრომლობით) ორგანიზებით გაიმართა.
