სასტუმრო „ქორთიარდ მარიოტში“ რეგიონული არბიტრაჟის განვითარებისადმი მიძღვნილი საერთაშორისო კონფერენცია გაიხსნა, რომლის მონაწილეებს მისასალმებელი სიტყვით საქართველოს ეკონომიკისა და მდგრადი განვითარების მინისტრმა დიმიტრი ქუმსიშვილმა მიმართა. კონფერენცია სახელწოდებით „რეგიონული არბიტრაჟის განვითარება, რეალობა, გამოწვევები და პერსპექტივები“ საქართველოს სავაჭრო-სამრეწველო პალატის მიერ დაფუძნებული საერთაშორისო საარბიტრაჟო ცენტრის, გაეროს განვითარების პროგრამისა (UNDP) და ნიდერლანდების სამეფოს მთავრობის მხარდაჭერით ტარდება. კონფერენციის ფარგლებში ურთიერთანამშრომლობის მემორანდუმიც გაფორმდა, რომელსაც ხელი ჰააგის მუდმივმოქმედი საარბიტრაჟო სასამართლოსა და საქართველოს საერთაშორისო საარბიტრაჟო სასამართლოს წარმომადგენლებმა მოაწერეს.

„საქართველოში რეგიონული საარბიტრაჟო ცენტრის ჩამოყალიბება ძალიან მნიშვნელოვანია პირდაპირი უცხოური ინვესტიციების მოზიდვის კუთხით. ამ ინიციატივას აქტიურად უჭერს მხარს ეკონომიკისა და მდგრადი განვითარების სამინისტრო. სახელმწიფოში სანდო, მიუკერძოებელი და ეფექტური საარბიტრაჟო დაწესებულების, როგორც დავების მოგვარების ალტერნატიული მექანიზმის არსებობა ერთ-ერთ მნიშვნელოვან საშუალებას წარმოადგენს საინვესტიციო გარემოს განვითარებისთვის. ჩვენ გვაქვს ყველა პოტენციალი, მათ შორის გეოგრაფიული მდებარეობა, ენების ცოდნა, კარგი იურისტები, ანუ ყველა პირობა იმისთვის, რომ თბილისი გახდეს საარბიტრაჟო ცენტრი რეგიონში, რომელიც, როგორც უკვე აღვნიშნე, იქნება კიდევ ერთი უპირატესობა ჩვენი ქვეყნისთვის“ - განაცხადა დიმიტრი ქუმსიშვილმა.

კონფერენციის მონაწილეებს ასევე სიტყვით მიმართეს საქართველოს სავაჭრო-სამრეწველო პალატის პრეზიდენტმა ნინო ჩიქოვანმა, საქართველოს უზენაესი სასამართლოს მოსამართლემ ნინო ბაქაქურმა, ნიდერლანდების სამეფოს ელჩმა საქართველოსა და სომხეთში იოს დაუმამ, ასევე გაეროს განვითარების პროგრამის ხელმძღვანელმა შომპი შარპიმ.

როგორც კონფერენციის ორგანიზატორებმა აღნიშნეს, ღონისძიების ფარგლებში ასევე დაგეგმილია სასწავლო სემინარები იურისტებისა და ახალგაზრდა პრაქტიკოსებისთვის. კონფერენცია 10 ოქტომბერს დასრულდება.