ჰააგის საერთაშორისო სასამართლომ შესაძლოა რუსეთ-საქართველოს ომის გამოძიება დაიწყოს. ამ თემას იუსტიციის მინისტრი თეა წულუკიანი გამოეხმაურა და აღნიშნა, რომ ხელისუფლების ინტერესია აგვისტოს ომის საქმეზე ეთნიკური წმენდის ნაწილი ბოლომდე იქნას გამოძიებული. მისი თქმით მთავარი პროკურატურა ამ მხრივ აქტიურ სამუშაოებს აწარმოებს.

"აგვისტოს ომის საქმეზე ჩვენი ინტერესია ეთნიკური წმენდის ნაწილი ბოლომდე იქნას გამოძიებული, რადგან ქართველთა ეთნიკური წმენდა ჩვენ ყველას გვახსოვს არის მომხდარი. მთავარი პროკურატურა თანამშრომლობს ქალბატონი ბენსუდას ოფისთან ერთადერთი ჩვენ ხელი არ მიგვიწვდება ოკუპირებულ ტერიტორიებზე არსებულ ინფორმაციაზე და იმედი მაქვს ქალბატონი ბენსუდა დაგვეხმარება ეს გამოვასწოროთ,"- განაცხადა თეა წულუკიანმა.

შეგახსენებთ,რომ ჰააგის საერთაშორისო სასამართლომ შესაძლოა რუსეთ-საქართველოს ომის გამოძიება დაიწყოს. "არსებობს საფუძვლიანი ვარაუდი იმისა, რომ 2008 წლის ომის დროს საქართველოში სამხედრო დანაშაულია ჩადენილი" – ამ შინაარსის განცხადება სასამართლოს ოფიციალურ ვებგვერდზეა განთავსებული.

ჰააგის სასამართლოს წესების მიხედვით სრულფასოვანი გამოძიების დასაწყებად პროკურორმა წინასწარი წარმოების პალატის ნებართვა უნდა მიიღოს.