სოფლის მეურნეობის სამინისტროსა და საქართველოს ყველის მწარმოებლთა გილდიის ორგანიზებით, უკვე ტრადიციად ქცეული ყოველწლიური ყველის ფესტივალი "კავკასიური ყველი 2015" გაიმართა.
ღონისძიებას თბილისის მუნიციპალიტეტის საკრებულოს თავმჯდომარე გიორგი ალიბეგაშვილი, დედაქალაქის მერი დავით ნარმანია, სოფლის მეურნეობის მინისტრი ოთარ დანელია , საკრებულოს დეპუტატი ზაზა კოლელიშვილი და მოწვეული სტუმრები დაესწრნენ.
გიორგი ალიბეგაშვილი დამსწრე საზოგადოებასა და ორგანიზატორებს მიესალმა და დარგის განვითარებასა და მნიშვნელობაზე ისაუბრა.
,,საქართველოში ყველის წარმოების კულტურა უძველესია და მსგავის ღონისძიებებიც სწორედ ქართული ყველის პოპულარიზაციას და საუკუნეების მანძილზე დაკარგული სახეობების აღორძინებას ემსახურება.’’,- განაცხადა გიორგი ალიბეგაშვილმა.ღონისძიებასზე სიტყვით დავით ნარმანია და ოთარ დანელია გამოვიდნენ და ფესტივალის არსისა და მიზნების თაობაზე საკუთარი ხედვები წარმოაჩინეს. 
წელს აქცენტი კავკასიური ყველის საუკეთესო სახეობებზე გაკეთდა.
ფესტივალი ,,კავკასიური ყველი" რიყის პარკში გაიხსნა და მასზე საქართველოს ყველა რეგიონიდან წარმოდგენილი 60-მდე სახეობის ყველი, მათ შორის დამბალ-ხაჭო, მუჩლი, გუდა, ჩეჩილი, ჩლეჩილი, ჩოგი, ტენილი, ნარჩვი, ლაგუჯიში, სულგუნი, ბერქეიზი, შუშველა, თაფლში და ღვინოში დავარგებული ყველი, ყველის როლები სხვადასხვა გულსართით, შებოლილი ყველი, ბეშუმური, ჭაჭამოდებული, თხის ყველის ნაირსახეობები იქნა წარმოდგენილი.
ფესტივალის სტუმრებს საშუალება მიეცათ ყველის ოსტატების მიერ ტრადიციული, უძველესი რეცეპტებით დამზადებული ქართული ყველის სახეობებსა და საქართველოში წარმოებული ევროპული, ბრენდირებული ყველის ანალოგები დაეგემოვნებინათ.
ყველის გამოფენა-გაყიდვის პარალელურად, საქართველოში ყველის წარმოებასთან დაკავშირებული ისტორიული არტეფაქტების მინაბაძების გამოფენა მოეწყო.
ასევე გაიმართა კონკურსიც, რომელზეც წლის ყველის მწარმოებელი რეგიონი და ხალხის რჩეული ყველი გამოვლინდა.
ფესტივალის ,,კავკასიური ყველი 2015" მხარდამჭერები არიან საქართველოს ეკონომიკისა და მდგრადი განვითარების სამინისტრო, თბილისის მერია და ინტელექტუალური საკუთრების ეროვნული ცენტრი ,,საქპატენტი"