Forbes Georgia-ს ახალი რედაქტორი და 10%-იანი წილის მფლობელი გიორგი ისაკაძე ხდება, - ამის შესახებ ინფორმაციას Forbes Georgia ავრცელებს. გამოცემის გავრცელებულ განცხადებაში ნათქვამია, რომ სს Media Partners-ის (Forbes Georgia-ს მფლობელი) აქციონერთა შემადგენლობა იცვლება და მისი 90%-ის მფლობელი ბიზნესმენი არმანჟან ბაიტასოვი (United Asia Business) გახდება. დარჩენილ 10%-ს შეისყიდის გიორგი ისაკაძე (GI Media Group), რომელიც Forbes Georgia-ს მთავარი რედაქტორის პოზიციასაც დაიკავებს.

"Forbes Georgia მოხარულია დაადასტუროს, რომ ორთვიანი მოლაპარაკებები აქციონერთა ახალ შემადგენლობასა და მთავარ რედაქტორთან წარმატებით დასრულდა. ვიმედოვნებთ, რომ განახლებული შემადგენლობა მნიშვნელოვნად გააძლიერებს Forbes Georgia-ს არსებულ გუნდს და საფუძველს ჩაუყრის ბევრ ახალ პროექტს, რომელთა განხორციელებასაც Forbes-ი უახლოეს მომავალში," - ნათქვამია განცხადებაში ამავდროულად გიორგი ისაკაძე ტელეკომპანია Maestro-ს ტელეპროექტების, „ბიზნესკონტაქტისა“ და „საქმიანი დილის“ ავტორი და მენეჯერია. არმანჟან ბაიტასოვი, გარდა იმისა, რომ ყაზახეთის Forbes-ის გამომცემელია, ფლობს უმსხვილეს მედიააქტივებს – სატელევიზიო არხებს Muzzone-ს, NBT-სა და TAH-ს; ასევე ფლობს სატელეკომუნიკაციო ჰოლდინგ ICON-ს, რომელიც, თავის მხრივ, მრავალი პოპულარული გამოცემისა და ჟურნალ-გაზეთის მეპატრონეა. გამოცემის აქციონერთა და რედაქტორის ცვლილებასთან დაკავშირებით 12 ოქტომბერს, 12:00 საათზე, Tbilisi Marriot-ში Forbes Georgia-ს პარტნიორთა პრესკონფერენცია გაიმართება. პრესკონფერენციას გამართავენ Forbes Georgia-ს გამომცემელი მაია მირიჯანაშვილი და ყაზახური Forbes-ის გამომცემელი, ბიზნესმენი არმანჟან ბაიტასოვი.