საქალაქო სასამართლომ "ცენტრ პოინტის" დამფუძნებელი მაია რჩეულიშვილს აღკვეთის ღონისძიებად წინასწარი პატიმრობა შეუფარდა. მაია რჩეულიშვილი დარბაზშივე დააპატიმრეს.

საქმეზე ბრალდებულ სხვა სამ პირსაც -  ირაკლი მინდელის, სალომე ჩარკვიანის და გურამ რჩეულიშვილის აღკვეთის ღონისძიებად წინასწარი პატიმრობა შეეფარდათ. 

პროკურატურა „ცენტრ პოინტის“ საქმეზე ოთხივე ბრალდებულის მიმართ აღკვეთის სახით პატიმრობის გამოყენებას ითხოვდა. ბრალდებულების ჩარკვიანისა და მინდელის ადვოკატები კი აღმკვეთის ღონისძიებად  20 ათას ლარიანი გირაოს ითხოვდნენ.

შემდეგი სასამართლო პროცესი  1 სექტემბერს 12:00 საათზე გაიმართება. 

მაია რჩეულიშვილის, ირაკლი მინდელის, სალომე ჩარკვიანის და გურამ რჩეულიშვილის მიმართ სისხლისსამართლებრივი დევნა დაწყებულია საქართველოს სსკ-ის 182-ე მუხლის მეორე ნაწილის „ა“ და მესამე ნაწილის „ბ“ ქვეპუნქტებით გათვალისწინებული დანაშაულის ნიშნებით, რაც თანხების მითვისებას და გაფლანგვას გულისხმობს.