დღეს ვუსმინე შალვა პაპუაშვილს. ისევ მახსენა. არ მწყინს, უბრალოდ დასანანია, როცა ადამიანის ასეთ დაცემას ვხედავ, - ასე ეხმიანება პატიმრობაში მყოფი პოლიტიკოსი, პაატა მანჯგალაძე საქართველოს პარლამენტის თავმჯდომარის შალვა პაპუაშვილის დღევანდელ განცხადებას.

როგორც მანჯგალაძემ აღნიშნა, სჯერა, რომ სიმართლე, ისევე როგორც სანთელი, თავის სინათლეს არ დაკარგავს.

„დღეს ვუსმინე შალვა პაპუაშვილს. ისევ მახსენა. არ მწყინს, უბრალოდ დასანანია, როცა ადამიანის ასეთ დაცემას ვხედავ.

ბატონო შალვა, შეგახსენებთ, რომ მე ერთ წელზე მეტია ტყვედ ვარ. არასდროს მიპასუხია თქვენი თავდასხმებისა და ცილისწამებისთვის, არა იმიტომ, რომ პასუხი არ მაქვს, არამედ მჯერა, სიმართლე, ისევე როგორც სანთელი, თავის სინათლეს არ დაკარგავს.

მართლა ვწუხვარ, როცა თავს ნომერ პირველ კანონმდებლად თვლით და ფოტოს გადაღება 7-წლიანი პატიმრობა გგონიათ, მით უმეტეს, არც ის იცით, რომ მე ბრალი წამიყენეს არა ფოტოს გამო, არამედ 2025 წლის 4 ოქტომბრამდე ერთი წლით ადრე გაკეთებული განცხადების გამო.

ბატონო შალვა, ვიდრე ღირსებით ევროპაში შევალთ, ჯერ აქ ვიაროთ ღირსებით.“ - აღნიშნავს პაატა მანჯგალაძე.

შალვა პაპუაშვილი 4 ოქტომბერს განვითარებულ მოვლენებთან დაკავშირებით მსჯავრდებულების საპროცესო შეთანხმების საფუძველზე გათავისუფლებას გამოეხმაურა.

„თქვენ რა გგონიათ, დიდი რევოლუციონერები სჭირდება ქვეყნის არევას? ასეთი ადამიანები, რომლებიც შემდეგ, პაატა მანჯგალაძესავით იტყვიან, ფოტოში შემთხვევით აღმოვჩნდი, ან მერე იტყვიან, აღარ მინდა პოლიტიკა, შემთხვევით აღმოვჩნდი, მოვინანიე და გავედიო და ა.შ. ასეთი ხალხი აწყობს ყველაზე დიდ სისხლისღვრას და მათ შორის, ეს საქართველოშიც არაერთხელ განგვიცდია“, - განაცხადა შალვა პაპუაშვილმა.