მჯერა, რომ მოახლოებულ საპარლამენტო არჩევნებში ,,ქართული ოცნება“ განახლებული გუნდით, არსებული გუნდის წევრებთან ერთად,  ისევ დამაჯერებლად გაიმარჯვებს!,-ამის შესახებ საქართველოს პრემიერ-მინისტრმა, პარტია „ქართული ოცნების“ თავმჯდომარე გიორგი კვირიკაშვილმა საგურამოში, მომავალი საპარლამენტო გუნდის განახლებული შემადგენლობის წარდგენისას განაცხადა.

 გიორგი კვირიკაშვილის თქმით, ამის რწმენას აძლევს „ქართული ოცნების“  ერთობა, შემართება, კონკრეტული მიზნები, მომავლის მკაფიო ხედვა.

„ გპირდებით, რომ ,,ქართული ოცნების“ თითოეული ნაბიჯი ჩვენი სამშობლოს წინსვლასა და სიძლიერეს მოემსახურება!“,-აღნიშნა პრემიერ-მინისტრმა.

„ქართული ოცნების“ თავმჯდომარის განცხადებით, დღეს ქართულ პოლიტიკას ახალი ენერგია, ახლებური ხედვა სჭირდება.

„დღევანდელი რეალობა ახალ დღის წესრიგს, ახალ მოთხოვნებს გვიყენებს, რომლებსაც ჩვენი პარტია განახლებული გუნდით ხვდება და მზად არის უპასუხოს ყველა გამოწვევას. დღეს მინდა წარმოგიდგინოთ ის ადამიანები, რომლებიც, დარწმუნებული ვარ, დადებით მუხტს შემოიტანენ არა მარტო ,,ქართულ ოცნებაში“, არამედ ზოგადად ქართულ პოლიტიკაში.

ქვეყანას მხოლოდ მაღალი ღირებულებების ერთგული და სახელმწიფოებრივად მოაზროვნე ადამიანები აშენებენ. სწორედ ამ ნიშნით შევარჩიეთ ჩვენი გუნდის ახალი წევრები, რომლებსაც  ზურგს უმაგრებთ კარგი რეპუტაცია, საუკეთესო განათლება და მაღალი პროფესიონალიზმი. მინდა გითხრათ, რომ თითოეული მათგანი მზად არის, საკუთარი ცოდნა და ენერგია ქვეყნის სამსახურს მოახმაროს“,-დასძინა გიორგი კვირიკაშვილმა.