16 ივლისს, 13:00 საათზე, მთაწმინდის პარკში, ქ. თბილისის მერიის კულტურული ღონისძიებების ცენტრის მხარდაჭერით ტარდება კულტურულ-შემოქმედებითი ღონისძიება შშმ მოზარდების მონაწილეობით სახელწოდებით „დაიცავი ჩემი უფლებები".

ღონისძიებაზე მოეწყობა შშმ პირთა მიერ შექმნილი ნამუშევრების გამოფენა, რომელშიც მონაწილეობას მიიღებენ თბილისში მცხოვრები შეზღუდული შესაძლებლობების მქონე პირები (დღის ცენტრების ბენეფიციარები - 40 შშმ პირი). ისინი წარმოადგენენ მათ მიერ შექმნილ ნამუშევრებს ხეზე, მინაზე, თექაზე და ნახატებს თემაზე „დაიცავი ჩემი უფლებები!". მათი მიზანია კიდევ ერთხელ დაანახონ საზოგადოებას, რომ არ არსებობს შეზღუდული შესაძლებლობები, რომ ყველა ადამიანი თანასწორია თავის შესაძლებლობებში, რომ საზოგადოების მხრიდან უბრალოდ საჭიროა ამ შესაძლებლობების გამოვლენის ხელშეწყობა. მსგავსი ღონისძიებები ხელს შეუწყობს შშმ პირების შემოქმედებითი შესაძლებლობების საზოგადოებისთვის წარმოჩენას.

პროექტის ფარგლებში დაიბეჭდება საინფორმაციო მასალები და ასევე მომზადდება ბანერი სლოგანით „დაიცავი და პატივი ეცი ჩემს უფლებებს", რომელსაც მთაწმინდის პარკში მისული სტუმრები ხელს მოაწერენ ნებაყოფლობით.

არასამთავრობო ორგანიზაცია  „ნაბიჯ-ნაბიჯ,  Step by Step"   პარტნიორ ორგანიზაცია  „Friends of the United Nations" USA-თან ერთად 2011-წლის დეკემბერში ოფიციალურად დარეგისტრირდა საქართველოში, თუმცა  ორგანიზაციის დამფუძნებლები, საბჭოს წევრები და წევრები ერთმანეთისგან დამოუკიდებლად  დიდი ხნის განმავლობაში მუშაობდნენ   შშმ პირთა პრობლემებზე. 2012-2013 წლებში ორგანიზაცია იყო აშშ-ში, კერძოდ ნიუ-იორკში ჩატარებული ადამიანთა უფლებების დაცვისადმი მიძღვნილი საერთაშორისო კონფერენციის  ერთ-ერთი ორგანიზატორი.

ორგანიზაციის მიზანია დაეხმაროს შეზღუდული შესაძლებლობის მქონე ბავშვებს და მოზარდებს  ცხოვრების ხარისხის გაუმჯობესებაში, ხელი შეუწყოს მათ ფიზიკურ, ფსიქო-სოციალურ რეაბილიტაციას და  საზოგადოებაში ინტეგრაციას.  ორგანიზაცია აქტიურად თანამშრომლობს საერთაშორისო ორგანიზაციებთან, რომლებიც მუშაობენ შეზღუდული შესაძლებლობის მქონე ადამიანების  პრობლემებზე.

ორგანიზაციის პრეზიდენტი გახლავთ გიორგი ქობალია, რომელიც 2002 წლიდან  პოსტვაქცინალური გართულების  გამო  დაავადდა  ენცეფალომიელიტით, რამაც თავის მხრივ განაპირობა ფიზიკური შესაძლებლობების შეზღუდვა. გიორგი 26 წლის ახალგაზრდაა, რომელმაც მიუხედავად თავისი მდგომარეობისა, შეძლო ძალიან ბევრი, გადალახა ბევრი წინააღმდეგობა და დღესდღეობით თავის გამოცდილებას უზიარებს ანალოგიურ მდგომარეობაში მყოფ ადამიანებს.

ორგანიზაციას აქვს გაფორმებული მემორანდუმი საზაფხულო ბანაკთან ამერიკაში, რომელიც ითვალისწინებს საქართველოდან შეზღუდული შესაძლებლობის მქონე მოზარდების  მშობლებთან ერთად აღნიშნულ ბანაკში გაგზავნას. ცხოვრების ხარჯებს აფინანსებს ამერიკული მხარე, ხოლო მგზავრობის ხარჯებს - ოჯახი.

ორგანიზაცია ქ. თბილისის მერიის კულტურული ღონისძიებების ცენტრის მხარდაჭერით ახორციელებს სხვადასხვა პროექტს შეზღუდული შესაძლებლობის მქონე მოზარდების ფსიქო-სოციალური რეაბილიტაციისა და მათი საზოგადოებაში ინტეგრაციის კუთხით.

ორგანიზაცია „ნაბიჯ-ნაბიჯ, Step by Step" ერთ-ერთია იმ არასამთავრობო ორგანიზაციებს შორის, რომელიც სწორედ ამ მიზანს ემსახურება - ნიჭიერი ახალგაზრდების გამოვლენა და მათი ხელშეწყობა.