გერმანიის შინაგან საქმეთა მინისტრი მოსახლეობას აფრთხილებს, რომ რადიკალთა მცირე ჯგუფებისა და დამოუკიდებლად მოქმედი ჯიჰადისტების მხრიდან თავდასხმები სავარაუდოდ გაგრძელდება.

ტომას დე მაზიერის განცხადებით, ქვეყნის ხელისუფლება ყველაფერს აკეთებს იმისთვის, რომ მსგავსი თავდასხმები აღკვეთოს, თუმცა ამის გარანტიები არ არსებობს.

“გერმანიაში მოსალოდნელია ახალი თავდასხმები რადიკალურად განწყობილი მცირე ჯგუფებისა ან დამოუკიდებლად მოქმედი ჯიჰადისტების მხრიდან”, - განაცხადა ტომას დე მაზიერმა.

18 ივლისს 17 წლის ავღანელი მიგრანტი ბავარიის ქალაქ ვიურცბურგთან მატარებელში მგზავრებს ცულით დაესხა თავს. დაშავდა ხუთი ადამიანი, მათგან ორის მდგომარეობა ამ დრომდე კრიტიკულია.

მოგვიანებით “ისლამურმა სახელმწიფოს” მებრძოლებმა გაავრცელეს განცხადება, სადაც ნათქვამი იყო, რომ თავდასხმელი მათი მებრძოლი იყო.

17 წლის ავღანელი გერმანიაში ერთი წლის წინ მშობლების თანხლების გარეშე ჩავიდა. ის ლტოლვილთა თავშესაფრის ცენტრში ცხოვრობდა, ორი კვირის წინ ახალგაზრდა ქალაქ ოქსენფურტში  მცხოვრებმა გერმანელების ოჯახმა შეიფარა. 

ტომას დე მაზიერის თქმით, მოზარდი ექსტრემისტული დაჯგუფება "ისლამური სახელმწიფოს" მიერ გავრცელებული პროპაგანდის მსხვერპლი გახდა. მინისტრის ინფორმაციით, არაფერი ადასტურებს იმას, რომ ის დაჯგუფების უშუალო მითითებებს ასრულებდა.