საერთაშორისო სასამართლოს პროკურორის მიერ საქართველოში სამხედრო და კაცობრიობის წინაშე ჩადენილი დანაშაულის ფაქტებზე გამოძიების ჩატარების მოთხოვნას ეხმაურება არასაპარლამენტო ოპოზიცია.

საქართველოს ევროპელი დემოკრატების თავმჯდომარე მოუწოდებს პროკურატურას სასწრაფოდ წაუყენოს ბრალი სეპარატისტთა ლიდერებს მათ მიერ ჩადენილ დანაშაულთან დაკავშირებით. პაატა დავითაია ჰააგას სასამართლოს მიერ გავრცელებულ განცხადებაში განსაკუთრებით ერთ ფაქტორს უსვამს ხაზს.

"ამ განცხადებაში ვხედავ ერთ მინუსს, სადაც საუბარია, რომ საქართველოში შეფერხებაა გამოძიებასთან დაკავშირებით. ეს შეფერხებები იმის გამოა, რომ ამდენი ხნის განმავლობაში არ წაუყენეს ბრალი სეპარატისტთა ლიდერებს, რომლებმაც ჩაიდინეს ეთნიკური წმენდა და დანაშაული ადამიანების წინააღმდეგ, ასევე რუსეთის ფედერაციის სამხედრო ნაწილების ხელმძღვანელების წინააღმდეგ, ვინც დანაშაული ჩაიდინა.

აქედან გამომდინარე, მოვუწოდებ საქართველოს მთავრობას, კერძოდ პროკურატურას სასწრაფო რეჟიმში - 30-დღიან ვადაში, წაუყენოს ბრალი სეპარატისტთა ლიდერებს მათ მიერ ჩადენილ დანაშაულთან დაკავშირებით და თუ არსებობს დანაშაულებები საქართველოს მხრიდან, როგორც მოითხოვა დროებითმა საპარლამენტო კომისიამ," - განაცხადა პაატა დავითაიამ.

 როგორც ცნობილია, სისხლის სამართლის საერთაშორისო სასამართლოს პროკურორი 2008 წელს საქართველოში შეიარაღებული კონფლიქტის დროს, სამხედრო და კაცობრიობის წინაშე ჩადენილი დანაშაულის ფაქტებზე გამოძიებას მოითხოვს. პროკურორმა ფატუ ბენსუდამ წინადადებით უკვე მიმართა მოსამართლეებს.