22 ივლისს 12:00 საათზე ეკონომიკისა და მდგრადი განვითარების სამინისტროს სსიპ საქართველოს ინოვაციების და ტექნოლოგიების ბაზაზე შექმნილი კიდევ ერთი ფაბ-ლაბი (სამრეწველო ინოვაციების ლაბორატორია) გაიხსნება. ამჯერად თბილისის  სამხატვრო აკადემიის ფაბ-ლაბი დაიწყებს ფუნქციონირებას, რომელსაც პირველი ვიცე-პრემიერი ეკონომიკისა და მდგრადი განვითარების მინისტრი დიმიტრი ქუმსიშვილი გახსნის. ფაბლაბი სამხატვრო აკადემიის ერთერთ კორპუსში ყიფშიძის ქუჩის 34 ნომერიში განთავსდება.  გახსნის ღონისძიებას დაესწრებიან საქართველოს ინოვაციების და ტექნოლოგიების სააგენტოს თავმჯდომარე ირაკლი ქაშიბაძე,თბილისის სამხატვრო აკადემიის რექტორი გია გუგუშვილი და კულტურისა და ძეგლთა დაცვის მინისტრი მიხეილ გიორგაძე.

სამხატვრო აკადემიის სამრეწველო ინოვაციების ლაბორატორია აღჭურვილი იქნება ულტრათანამედროვე აპარატურით, 3D პრინტერებით, ლაზერული მჭრელებით, პროგრამირებადი ჩარხებით  და სხვა მაღალტექნოლოგიური აპარატურით.  ასევე ფაბლაბში იქნება co-working space-საერთო სამუშაო სივრცე. ლაბორატორია ფიზიკურ პირებსა და კომპანიებს სხვადასხვა ინოვაციური პროდუქტის ტესტირების საშუალებას მისცემს. ლაბორატორიის ბაზაზე სხვადასხვა პროდუქტის პროტოტიპირება და მათი მცირე რაოდენობით წარმოება იქნება შესაძლებელი.

საქართველო 2015 წელს ფაბ-ლაბების მსოფლიო სიმპოზიუმზე გახდაე.წ. ფაბ-ქვეყანა. ამ სტატუსის მატარებელ ქვეყანას აქვს საშუალება ცოდნაზე დაფუძნებული ეკონომიკის მშენებლობის უნიკალური მოდელი გამოიყენოს.

პირველი ფაბ-ლაბი საქართველოს ეკონომიკისა და მდგრადი განვითარების სამინისტროს სსიპ საქართველოს ინოვაციების და ტექნოლოგიების სააგენტოს ხელშეწყობით თბილისში შეიქმნა და დღეს დაინტერესებულ ადამიანებს აქტიურად და წარმატებით ემსახურება.

ამჯერად ფაბ-ლაბები ფუნქციონირებს ბათუმში შოთა რუსთაველის სახელობის  და ქუთაისში აკაკი წერეთლის სახელობის უნივერსიტეტებში.

ფაბ-ლაბების ქსელის გახსნა 2016 წლის ბოლომდე იგეგმება  სხვადასხვა რეგიონებში, მათ შორის ზუგდიდში.

FAB LAB-ი არის  უნიკალური საშუალება მცირე ბიზნესის დასაწყებად, რის შედეგადაც შეიქმნება ახალი სამუშაო ადგილები და პირდაპირ აისახება ქვეყნის ეკონომიკურ წინსვლაზე.