მოსამართლეებზე ზეწოლას გიორგი პაპუაშვილი ახორციელებს, აღნიშნულის შესახებ განცხადება ,,უფლებადამცველთა გაერთიანების’’ თავმჯდომარემ ნიკოლოზ მჟავანაძემ გააკეთა.

როგორც ცნობილია, საკონსტიტუციო სასამართლოს თავმჯდომარე გიორგი პაპუაშვილმა ცალკეული მოსამართლეების თვალთვალსა და დაშანტაჟებასთან დაკავშირებით გუშინ ოფიციალური განცხადება გააკეთა. მისი თქმით, მიზანმიმართული ზეწოლა მიმდინარეობს, ძირითადად, იმ მოსამართლეებზე, რომლებიც მაღალი საზოგადოებრივი ინტერესის მქონე საქმეებს განიხილავენ.

აღნიშნულთან დაკავშირებით ,,უფლებადამცველთა გაერთიანების’’ თავმჯდომარე ნიკოლოზ მჟავანაძემ მედიისთვის შესაბამისი განცხადება გააკეთა:

,,მას შემდეგ რაც საკონსტიტუციო სასამართლოს მოსამართლეებმა ოთარ ჭითანავამ, მერაბ ტურავამ, ლალი ფაფიაშვილმა და ზაზა თავაძემ განაცხადეს რომ ისინი უარყოფენ რაიმე ზეწოლას მათ საქმიანობასთან დაკავშირებით და გამორიცხავენ მათ მიმართ ხელისუფლების მხრიდან  რაიმე შანტაჟსა თუ თვალთვალს.  საკონსტიტუციო სასამართლოს თავმჯდომარის მოადგილემ ზაზა თავაძემ ისიც კი თქვა გაკვირვებული ვარ რატომ არ შეათანხმა პაპუაშვილმა თუკი იგი ამდაგვარ განცხადების გაკეთებას აპირებდაო.  ნათელი გახდა გიორგი პაპუაშვილის განცხადების არსი და მიზანი.

როგორც ჩანს,  მან იცის იმ რეზონანსული საქმეების მიმართ, რომლის ინტერესი აქვს მის უშუალო უფროს მიხეილ სააკაშვილს რა პოზიცია აქვთ მოსამართლეებს  და შეგნებულად ცდილობს არაჯანსაღი სიტუაცია შექმნას გადაწყვეტილების გამოტანამდე, რათა შემდეგომ საზოგადოებას ის განცდა დაუტოვოს რომ იმიტომ გამოვიდა კონკრეტულ საქმეზე ესა თუ ის გადაწყვეტილება რომ   მოსამართლეებმა ხელისუფლების ზეწოლას ვერ გაუძლეს.

 პაპუაშვილის მიერ მოსამართლეების პირადი ცხოვრების ამსახველი კადრებზე მინიშნებაც, გარკვეულ შანტაჟს წააგავს. ყველამ კარგად იცის რომ ნაცმოძრაობის ზონდერებს პირადი ცხოვრების კადრების დუბლიკატები წაღებული აქვთ საქართველოდან და თუკი სააკაშვილმა და მისმა ხელქვეითმა პაპუაშვილმა დაინახეს, რომ საქმე ისე არ მიდის, როგორც მათ სურთ. გამორიცხული არაა, რომელიმე მოსამართლის შესახებ გაავრცელონ კიდეც პირადი ცხოვრების ამსახველი კადრები, რაც შემდგომში მათ მიერ ხელისუფლებას დაბრალდება“, განაცხადა მჟავანაძემ.