უკრაინული გამოცემა delo.ua-ს ინფორმაციით, ავიაკომპანია Bravo კიევი-ბათუმი-კიევის მიმართულებით რეგულარული ფრენების რაოდენობას გაზრდის.

სტატიაში „სად იფრენს 1-ელი აგვისტოდან უკრაინული ავიაკომპანიები“ აღნიშნულია, რომ უკრაინის ავიაციის სამსახურის მიერ დაკმაყოფილებულია ავიაკომპანია Bravo-ს მოთხოვნა საქართველოს მიმართულებით სიხშირეების ზრდაზე. უფრო კონკრეტულად კი კიევი-ბათუმი-კიევის მიმართულებაზე.

როგორც საქართველოს სამოქალაქო ავიაციის სააგენტოში განმარტავენ, უკრაინული ავიაკომპანია Bravo Airways-ი საქართველოს მიმართულებით ჩარტერულ საჰაერო მიმოსვლას ასრულებს კიევი-ბათუმი-კიევის საჰაერო ხაზზე. კვირაში 1 სიხშირით.

სააგენტოს ინფორმაციით, თავდაპირველად ავიაკომპანიას მიენიჭა 3 თვიანი ნებართვა (18 ივნისიდან – 18 სექტემბრამდე) 1 სიხშირეზე, ხოლო შემდეგ მათივე მოთხოვნით მოხდა კიდევ ერთი (6 ივლისიდან 31 აგვისტომდე) სიხშირის დამატება.

„ავიაკომპანიას მინიჭებული ჰქონდა საჰაერო მიმოსვლის განხორციელების უფლება კვირაში 2 სიხშირით, თუმცა 26 ივლისს სააგენტოში მოვიდა განაცხადი ერთი სიხშირის გაუქმების შესახებ. შესაბამისად ავიაკომპანიას კვირაში მხოლოდ 1 რეისი დარჩა“, – აცხადებენ სამოქალაქო ავიაციის სააგენტოში.

რაც შეეხება რეგულარულ რეისებს, რაზეც delo.ua-ს ინფორმაციაშია აღნიშნული, სამოქალაქო ავიაციის სააგენტოს Bravo Airways-გან განაცხადი ამ დრომდე არ მიუღია.