რეგიონული განვითარების და ინფრასტრუქტურის მინისტრის მოადგილე თენგიზ შერგელაშვილის განცხადებით, "მთის შესახებ კანონით“ გათვალისწინებული შეღავათების მისაღებად მაღალმთიანი სტატუსის მქონე რაიონებში მცხოვრებ მოსახლეობას პირუტყვთან და ყანაში ფოტოების გადაღება და შესაბამისი მუნიციპალიტეტის გამგეობაში მიტანა არ სჭირდება.  როგორც შერგელაშვილმა "ბიზნესკონტრაქტს“ განუცხადა, "ამას მოსახლეობას მთის კანონი არ ავალდებულებს“.

"მაცხოვრებლები თვითონ წყვეტენ, რა წარადგინონ იმის დასადასტურებლად, რომ ამა თუ იმ მაღალმთიან რაიონში ცხოვრობენ. ჩემი ინფორმაციით, საქონელთან ფოტოების გადაღება ქვემო ჭალოვანის გამგებლის წარმომადგენლის ინიციატივაა, მაგრამ ზუსტად არ ვიცით. შეიძლება, გამგებლის წარმომადგენელმა არასწორი განმარტება გაუკეთა მოსახლეობას. ვარკვევთ დეტალებს და დღეს ჭიათურის გამგეობა გააკეთებს ამ თემაზე განცხადებას", - განუცხადა "ბიზნესკონტრაქტს" შერგელაშვილმა.

ცნობისთვის, პარლამენტმა "მთის შესახებ კანონი“ 2016 წლის გაზაფხულზე მიიღო კანონი. კანონის თანახმად, მაღალმთიანი დასახლების სტატუსი განისაზღვრა და იქ მცხოვრებ მოსახლეობას გარკვეული შეღავათები დაუწესდა.

წყარო: businesscontact