Gem Fest-ი - „ჩვენ თავიდანვე ვამბობდით, რომ ეს იქნებოდა ქვეყნის სავიზიტო ბარათი"
Gem fest-2016-ის შედეგების პრეზენტაცია დღეს, ტექნოპარკში გაიმართა. ფესტივალის დამფუძნებელი და ორგანიზატორი გიორგი სიგუა მედიას და სხვა დაინტერესებულ პირებს შეხვდა და საზოგადოებას ანგარიში ჩააბარა, პროექტის შესახებ, რომელიც “checkin GEORGIA”-ს ფარგლებში 1,9 მლნ ლარით სახელმწიფო ბიუჯეტიდან დაფინანსდა. გიორგი სიგუამ მადლიერება გამოთქვა საქართველოს მთავრობის, სამეგრელოს რეგიონის ხელმძღვანელობისა და პირადად, პრემიერ-მინისტრ გიორგი კვირიკაშვილის მიმართ, რომელმაც რეგიონში არსებულ ყველაზე მასშტაბურ და წარმატებულ ელექტრონული მუსიკის ფესტივალს მხარდაჭერა გამოუცხადა. გიორგი სიგუას თქმით, სწორედ მთავრობის და პირადად პრემიერ-მინისტრის მხარდაჭერით Gem Fest საქართველოსთვის სუპერწარმატებული პროექტი გახდება მსოფლიოს მასშტაბით.
"მხარდაჭერა, რომელიც ჩვენ გვაქვს მთავრობისგან და პირადად გიორგი კვირიკაშვილისგან, გვაძლევს იმის საშუალებას, რომ Gem Fest-ი გახდეს მეგაპროექტი და სუპერწარმატებული პროექტი ქვეყნისთვის. როგორც ჩვენ თავიდანვე ვამბობდით, როდესაც ფესტივალს ვქმნიდით, ეს იქნება ქვეყნის სავიზიტო ბარათი”,- განაცხადა გიორგი სიგუამ.
GEM fest 2016-ზე სტუმართა რაოდენობამ 30 000 ადამიანს გადააჭარბა, აქედან 1500-ზე მეტი ვიზიტორი მოსკოვში გაუქმებული ფესტივალის, “აუთლაინის” ბილეთებით, 9-14 აგვისტოს ანაკლია-განმუხურში გამართულ ფესტივალს, სრულიად უსასყიდლოდ დაესრწო. წელს 5 სცენაზე 133-მა არტისტმა დაუკრა, მათ შორის ისეთმა მსოფლიო დონის ელექტრონული მუსიკის ლეგენდებმა, როგორებიც არიან Paul Kalkbrenner, Fedde Le Grand, Paul Van Dyk, Stephan Bodzin,Gus Gus, Dub FX , Boris Brejcha და სხვა.
საფესტივალო ტერიტორიაზე მოწყობილ 3000-ზე მეტ კარავს, ანაკლია-განმუხურსა და ზუგდიდში არსებულ სასტუმროებსა და “გესთ ჰაუსებს” ვიზიტორები 82 ქვეყნიდან სტუმრობდნენ. წელს ანაკლიაში გამართულ საერთაშორისო ზეიმს 150-მდე აფხაზეთის ავტონომიურ რესპუბლიკაში მცხოვრები პირი დაესწრო.
ფესტივალი 20-ზე მეტმა საერთაშორისო მედიამ გააშუქა და სამეგრელოს რეგიონში 6 დღის განმავლობაში რამდენიმე ათეული მილიონი ლარი დაიხარჯა. როგორც ორგანიზატორები აცხადებენ, GEM Fest 2017 ერთთვიანი სახალხო ზეიმი, კიდევ უფრო მასშტაბური და შთამბეჭდავი იქნება, თუმცა დეტალებს საგანგებო პრეზენტაციამდე ასაიდუმლოებენ.
