16 ოქტომბერს, საქართველოს ფინანსთა მინისტრი ნოდარ ხადური გერმანიის ფედერაციული რესპუბლიკის საგანგებო და სრულუფლებიან ელჩთან საქართველოში, ბეტინა კადენბახს შეხვდა.

ფინანსთა მინისტრმა ელჩს მადლობა გადაუხადა იმ მხარდაჭერისთვის, რომელსაც გერმანია უწევს საქართველოს რეფორმების განხორციელების მიმართულებით. როგორც მინისტრმა აღნიშნა, ფინანსთა სამინისტრო აქტიურად თანამშრომლობს როგორც გერმანიის რეკონსტრუქციის საკრედიტო ბანკთან, ისე გერმანიის საერთაშორისო თანამშრომლობის საზოგადოებთან.

შეხვედრისას, ნოდარ ხადურმა სტუმარს მიაწოდა დეტალური ინფორმაცია ფინანსთა სამინისტროს საქმიანობის შესახებ, იმ რეფორმების თაობაზე, რომელიც მიმდინარეობს საგადასახადო კანონმდებლობის სრულყოფის, ბიზნესგარემოს გაუმჯობესების, გადამხდელთათვის სერვისებისა და მომსახურების გამარტივების, საჯარო ფინანსების ეფექტიანი მართვის, ფულის გათეთრების წინააღმდეგ ბრძოლის, თანამშრომელთა კვალიფიკაციის ამაღლების მიმართულებით.

გერმანიის ელჩმა კიდევ ერთხელ ხაზი გაუსვა საქართველოსთან პარტნიორობის მნიშვნელობას, ასევე სექტემბერში, თბილისში საქართველოსა და გერმანიის ფედერაციულ რესპუბლიკას შორის ფინანსური და ტექნიკური თანამშრომლობის სფეროში გამართული სამთავრობო მოლაპარაკებების მნიშვნელობას და აღნიშნა, რომ გერმანია კვლავ გააგრძელებს საქართველოსთვის პრიორიტეტული მიმართულებების დაფინანსებას.