საბურთალოს რაიონში, ბუდაპეშტის ქუჩის N6-ში სპორტული მოედნის რეაბილიტაცია დასრულდა. ახლადგახსნილ სტადიონზე საბურთალოს რაიონის გამგებელი ბექა მიქაუტაძე ადგილობრივ მოსახლეობას შეხვდა და განხორციელებული პროექტის შესახებ მათი შეფასებები მოისმინა.

შეხვედრაზე იმყოფებოდნენ სხვადასხვა თაობის ქართველი ფეხბურთელები: ოთარ გაბელია, გიორგი ნემსაძე, გიორგი დევდარიანი, რომლებმაც სტადიონზე მყოფ პატარებს მცირე მასტერკლასი ჩაუტარეს.

„ჩვენი წინა თაობები გაიზარდნენ ზუსტად ამ ქუჩის ფეხბურთით. მიხარია, რომ ამდენ კორპუსში ბავშვებს ექნებათ საშუალება ითამაშონ და თუ დიდი ფეხბურთელები არ გამოვლენ, ჯანსაღი ცხოვრების წესით მაინც იცხოვრებენ. მისასალმებელია ასეთი ინფრასტრუქტურის არსებობა ჩვენს ქალაქში,“ - განაცხადა გიორგი ნემსაძემ. 

ახალი სპორტული მოედანი ბუდაპეშტისა და ტაშკენტის ქუჩებს შორის არსებულ დასახლებას მოემსახურება. მომავალ წელს კი მოედნის მიმდებარედ გამგეობა სკვერს მოაწყობს.

“15-ზე მეტი სტადიონის რეაბილიტაცია მოვახერხეთ წელს საბურთალოზე. მინდა ვთქვა, რომ პირდაპირპროპორციულია აღნიშნული სტადიონების გახსნა-რეაბილიტაცია, საქართველოში ყველაზე საყვარელი სპორტის სახეობის, ფეხბურთის განვითარებისათვის. ვხედავთ, რომ არაკომფორტული ინფრასტრუქტურა იწვევს ჩავარდნას ამ სფეროში, შესაბამისად, აუცილებელია ამ ინფრასტრუქტურის განვითარება,“- განაცხადა საბურთალოს რაიონის გამგებელმა ბექა მიქაუტაძემ.