ცესკო-ში ყველა საჭირო დოკუმენტი ნახევარი საათით ადრე შევიტანეთ. ხარვეზების გასასწორებლად 3 დღე არსებობს, მაგრამ გასწორებული ვარიანტი მაშინვე მივიტანეთ, - განაცხადა “მრეწველების” ლიდერმა, გოგი თოფაძემ გადაცემა 2030-ში.

“რატომღაც, ცესკო-მ ეს დოკუმენტი ვერ მონახა, დღეს კი აცხადებენ, რომ თითქოს, დოკუმენტები 7 წუთის დაგვიანებით შევიტანეთ. ჩვენი დოკუმენტების გაქრობის მეორე დღეს, როცა საქმეში კონკრეტული ძალები ჩაერია, განაცხადეს, რომ თითქოს, “მრეწველების” სია სრულყოფილი არ იყო.  თანმხლები დოკუმენტებით ჩვენს მიერ შეტანილ პარტიულ სიას ხელს აწერს მიმღები კომისია და აქვს შესაბამისი ბეჭედი. გარდა ამისა, თუ რეგისტრაციიდან მოხსნილი ვიყავით, ჩვენს 45 მაჟორიტარობის კანდიდატს პასუხი რატომ გაუგზავნეს, რომ მათი დოკუმენტაცია მიღებულია?! მიმაჩნია, რომ ჩვენი დოკუმენტაციის დამალვა ვიღაცის ინტერესებში იყო, რადგან ჩვენ ამომრჩეველთან ბევრი ვიმუშავეთ და ვიცით, რომ დიდი მხარდაჭერა გვაქვს. ვხედავთ, ხალხს როგორ მოსწონს ჩვენი პოზიცია, რომ ქვეყანა უცხოელების მართვით არ უნდა იყოს, რომ უნდა დავიცვათ ჩვენი ისტორია, კულტურა, სარწმუნოება, რომ არ შეიძლება, სულ ვიღაც გვკარნახობდეს. ჩვენ არ გავჩერდებით და მორალური თუ ფინანსური ზარალის გამო საქმეს აღვძრავთ”, - განაცხადა “მრეწველების” ლიდერმა გოგი თოფაძემ.