გლდანის რაიონის გამგეობის ორგანიზებით, 17-18 სექტემბერს  სპორტული ჩემპიონატი ,,გლდანის თასი ქუჩის კალათბურთში’’ გაიმართა. ტურნირში გლდანის რაიონში მცხოვრები ახალგაზრდებით დაკომპლექტებული 16 გუნდი მონაწილეობდა, რომელთაგან გამარჯვება გუნდმა „Striba“-მ მოიპოვა.

ტურნირის მონაწილე სამი საუკეთესო გუნდი გლდანის რაიონის გამგებელმა დიმიტრი ორმოცაძემ სპეციალური საჩუქრებით დააჯილდოვა.

,,უპირველეს ყოვლისა, მინდა, მადლობა გადავუხადო გლდანის რაიონის გამგეობას ასეთი შესანიშნავი ტურნირის ჩატარებისთვის. ტურნირი ძალიან კარგად იყო ორგანიზებული და ჩვენ, ყველანი, კმაყოფილები ვართ. მინდა მივულოცო ბიჭებს, ჩვენს გუნდს და ასევე მინდა, ყველას მადლობა გადავუხადო მონაწილეობისთვის“,- განაცხადა გამარჯვებული გუნდის კალათბურთელმა, დავით მაისურაძემ.

ჩემპიონატის ჩატარება ახალგაზრდებში სპორტით დაინტერესებასა და ჯანსაღი ცხოვრების წესის დამკვიდრებას ემსახურებოდა.

,,დაძაბული და სანახაობრივი ტურნირი გამოვიდა. ამისთვის მადლობას ვუხდი თითოეულ მონაწილე გუნდს. ძალიან მნიშვნელოვანია მსგავსი ღონისძიებების ჩატარება გამომდინარე იქიდან, რომ ამით ჯანსაღი ცხოვრების წესის ხელშეწყობა ხდება. გლდანის რაიონის გამგეობა სისტემატურად მართავს ასეთ ღონისძიებებს’’, - განაცხადა დიმიტრი ორმოცაძემ.  

გამგებელმა გლდანში ახალი, თანამედროვე სტანდარტების კალათბურთის მოედნის მოწყობაც დაანონსა და ახალგაზრდებს პროექტის განხორციელებაში ჩართულობისკენ მოუწოდა.

,,მინდა იმ სიურპიზის შესახებ გამცნოთ, რასაც მომავალ წელს გლდანის გამგეობა გიმზადებთ. ესაა ახალი, თანამედროვე კალათბურთის მოედანი. მინდა, რომ თქვენც ჩაერთოთ ამ პროცესში და ერთად გავაკეთოთ ახალი კალათბურთის მოედანი გლდანში’’, - თქვა გამგებელმა.  

ჩემპიონატის გამარჯვებული გუნდი „Striba“, გლდანის რაიონის სახელით, თბილისის ჩემპიონატზე იასპარეზებს და სხვა რაიონების გამარჯვებულ გუნდებს დაუპირისპირდება.