თბილისის მერმა დავით ნარმანიამ, მერის მოადგილე ნინა ხატისკაცთან და მერიის განათლების, სპორტისა და ახალგაზრდულ საქმეთა საქალაქო სამსახურის უფროსთან, ირაკლი გვილავასთან და კრწანისის რაიონის გამგებელთან ერთად, ფონიჭალაში განახლებული ახალგაზრდული ცენტრი გახსნა. ღონისძიებას საკრებულოს თავმჯდომარე გიორგი ალიბეგაშვილი და საკრებულოს დეპუტატები ესწრებოდნენ.

ცენტრი ახალგაზრდებს შესაძლებლობას მისცემს დაგეგმონ და სწორად მართონ თავისუფალი დროის ნაწილი, არაფორმალური განათლება მიიღონ სხვადასხვა სფეროში.

ახალგაზრდულ ცენტრში ფუნქციონირებს როგორც საგანმანათლებლო, ასევე სპორტული მიმართულება. ცენტრი, პირველ ეტაპზე, ახალგაზრდებს შესაძლებლობას მისცემს მაგიდის ჩოგბურთი, ჭადრაკი, მუსიკა, ფერწერა, გრაფიკა, IT-ინჟინერია და გრაფიკული პროგრამები უფასოდ შეისწავლონ.

დავით ნარმანიას განცხადებით, აღნიშნული ცენტრის გახსნით, თბილისის მერმა შეასრულა ყველა ის წინასაარჩევნო დაპირება, რაც ფონიჭალის მოსახლეობისთვის ჰქონდა მიცემული.

„ახალგაზრდული ცენტრის გახსნა ძალიან მნიშვნელოვანი პროექტია, ვინაიდან ახალგაზრდებს ეძლევათ საშუალება დაკავდნენ სხვადასხვა სპორტული  აქტივობებით, შეისწავლონ პროგრამირებასთან დაკავშირებული რამდენიმე მიმართულება და თავად შეძლონ საკუთარი უბნის განვითარების პროექტების  მომზადება. ცენტრში არის შეხვედრების ოთახი, საინფორმაციო სივრცე, სადაც ძალიან ბევრი აქტივობის შესაძლებლობა იქნება. დაინტერესებული პირების რეგისტრაცია მალე დაიწყება და მათი ინტერესებიდან გამომდინარე მომზადდება ის ძირითადი პროგრამები, რომლის ფარგლებშიც ისინი გადამზადდებიან“ - განაცხადა დედაქალაქის მერმა.

ცენტრის რეაბილიტაციისთვის თბილისის მერიის ბიუჯეტიდან 205 000 ლარი გამოიყო, რითიც შენობის სრული რეაბილიტაცია-რეკონსტრუქცია განხორციელდა და თანამდეროვე სტანდარტების შესაბამისი ტექნიკით აღიჭურვა. განახლებული სივრცე  შეზღუდული შესაძლებლობების მქონე პირებისთვის ადაპტირებულია.

ახალგაზრდული ცენტრი დღის განმვალობაში 100 ახალგაზრდას მოემსახურება.